Nongpoh, Nailur, 03: Namar kiba bun ki mat kiba ktah ïaka imlang ka sahlang, kiba donkam ruh ban pynsngewthuh bad ban ai jinghikai sha ki paidbah naduh ki khynnah bad ki samla, ka Ri-Bhoi Peoples’ Council mynta ka sngi kala pynlong da ka awareness programme halor ka shongkha khynnah, ka jingarmet haka por ba dang khynnah, ka jingkyrni haki jingdih buaid, POCSO Act, Cyber Crime, JJ Act bad kumjuh ruh ka jingiehnoh shiteng por jong ki khynnah ban leit skul.
Ïa katei ka prokram la pynlong ha iing Dorbar jong ka shnong Umling bala wan ruh ban shim bynta da u Bah Teibor Kyndiah District Child Protection Officer, Kong G Warjri District Health Education Officer, Kong Darihun Sohtun District Out of School Coordinator, Ri-Bhoi District, haka jingdonlang ki nongïalam ka seng naduh u Bah Jayson Lennox Nongrum President ka RBPC sengkmie, Bah Lasaros Ranee President RBPC Umling Circle, Bah Commenson Wahlang Rangbah Shnong bad kiwei kiwei.
Na ka liang kitei ki ophisar kila ai ka jinghikai kaba bñiah sha ki paidbah halor kitei ki mat kiba ktah ïaka imlang ka sahlang naduh ka shongkha khynnah, ka jingarmet bym pat dei por, ka jingkyrni haki jingdih buaid, ka jingpep skul shiteng por kiba dei ki mat kiba donkam ban ïatai ïathir haka imlang ka sahlang bad kum ki kmie ki kpa ki dei ban don ka jingkitkhlieh naka bynta ki khun ki kti bad ka lawei ka jong ki.
Ka prokram ka la long kaba seisoh bad ai jingmyntoi ïakiba bun ki paidbah nongshong shnong kum ka jinghikai ruh sha ki khun samla khamtam ha kane ka juk ba mynta ba kim dei ban ngop haki jingsniew, ki jingshah pynshoi hynrei ban pynleit jingmut haki jingpule bad tip la ka akor ka burom khnang ba ka lawei ka jong ki kan long kaba phyrnai.
