Shillong, Naiwieng 26 : U Bah Process T Sawkmie, kum u Co Chairman ka State Development Reform Commission u la leit jngoh ïa ki skhim kiba u la pynioh ha ka por jinglong MLA jong u na ka bynta ka shnong Umpling Umjathang, kaba don hapoh u pud u sam ka Mawlai Konstitwensi, kawei ka skhim ka dei haba shna ïa ka kamra klas bad kawei ka dei ka madan phutbol.
Haba iakynduh ïa u rangbah dong ka Umpling Umjathang u bah K. Kharumlong bad ki dkhot ka excutive committee u bah Sawkmie, MLA barim u la pynpaw ïa ka jingkmen ban iohi ia ka jingiaid ka kam shaphrang shakhmat haba shna ia ka kamra klass bad kaba la jan dep artad, kumjuh ïa ka madan phutbol.
Haba ïa dei bad ka madan phutbol u pynpaw ba kum u Co Chairman ka State Development Reform Commission un sa ïa kren bad ka sorkar ba kin lah ban pyndep ia ka madan kumba ki angnud, nalor kaba ki la pyntreikam na ka skhim jong u.
Ka jingangnud jong ka shnong Umpling Umjathang haba ïa dei bad ka madan ka long ban tei Gallery, ki kynroh bad kiwei de. U la kyntu ruh ïa ki paidbah nong Mawlai ba kin mih laitluid shakhmat ban pynpaw ïa kino kino ki jingeh kaba ki don, watla um long shuh u MLA hynrei ha i bor barit un pyrshang ban ïarap ia ki.
Ha kane ka sngi la ia don lang u bah Wanseng Jyrwa ba la synran ïa u.
