Nongpoh, Nailur, 25: Bun ki briew ba la suba ba ki dei kiba donkti ha ka kam khaïi beaiñ ïa ka Petrol bad diesel ha ka surokbah National Highway-6 ha Ri Bhoi, ki la shah kem noh ha ki bor Pulit hadien ba ki Pulit ki la ioh ia ka jingtip ba thikna na ki tnat syntiat ba ka don ka jingkhaïi beaiñ ïa ka Petrol bad Diesel.
Kumba la ioh lum jingtip da u nongthoh khubor, la ong ba ki bor Pulit na nongbah Shillong ki la hiar sha Ri Bhoi ha ka janmiet Sngi Palei ban leit khynra ïa ki ktem ba ki briew kiba donkti ki ju pyndonkam ban khaïi beaiñ ïa ka Petrol bad Diesel bad ha kane ka jingleit khynra ki la iohkem bun ngut ki briew kiba donkti ha kane ka kam.
Halor kane ka jingkhynra jong ki Pulit ïa ki ktem khaïi beaiñ ïa ka Petrol bad Diesel ha Ri Bhoi, la ioh jingtip ruh ba ka lah ban don ka jingkhleh tuh ïa ka Petrol bad Diesel da ki umphniang sharak bad kiwei kiwei ki jait jingkhleh tangba kin nongshim kabu kin dup ioh jingmyntoi.
Halor kane jingshah khynra jong ki ktem khaïi beaiñ ïa ka Petrol bad Diesel, u nongthoh khubor u la pyrshang ruh ban wad jingtip na ki bor Pulit ka Ri Bhoi, hynrei ka jubab ba la ioh na ki bor Pulit ka Ri Bhoi, la ong ba ka dei ka kam ba la leh da ki bor Pulit na nongbah Shillong bad kum ki bor Pulit kim shym la lah ban ai kano kano ka jingtip kaba bniah.
Shuh shuh, halor kane ka kam, la ioh lum jingtip ruh ba ka jingkhynra ïa kum kine ki ktem khaïi beaiñ ïa ka Petrol bad Diesel kam dei satia tang ha Ri Bhoi, hynrei ki don ruh sha ki bynta jong ka East Khasi Hills ha kaba ki bor Pulit ki la khynra naphang ban tehlakam ïa kum kine ki kam beaiñ ba la leh da ki riewshim kabu ban khaïi beaiñ ïa ka Petrol bad Diesel da kaba khleh lang da ka umphniang sharak ne kiwei kiwei jait jingkhleh.
Halor kane ka kam beaiñ, ym pat lah ioh satia ïa ka jingtip kaba bniah na ki bor Pulit kiba la don bynta ban kem ïa ki briew bad ban khynra ïa ki ktem khaïi beaiñ ïa ka Petrol bad Diesel bad kane ka dei tang ka tyllong khubor ba la iohlum da u nongthoh khubor.
