Shillong, Lber 21: Ka seng National People’s Party ka la pynpaw ba kum shibynta ban aiti met bad mynsiem ban shakri ïa ki paidbah jong ka jylla bad jong ka ri, ka la leh bun tylli ki kam na ka bynta kane ka jingthmu.
Kumta kum ka dak jingleit ai mynsiem bad jingïadonlang bad ki khynnah skul kiba la ngat ha ka jingbam ba don bih ha jylla Karnataka, na ka liang ka kynhun jong ka NPP bad ka NPYF jong ka jylla Karnataka State Unit ki la leit ban jngoh ïa ki khynnah skul jong ka jylla Meghalaya kiba la ïohpang na ka daw jong ka jingngat bih ha ka jingbam ha Mandya, Karnataka.
Ha kane ka jingleit jngoh ki la pynpaw ba ka seng ka donlem bad kine ki khynnah kumjuh ruh bad kiba haïing hasem jong kiba la mad ha kane ka jingjia kaba ym poi pyrkhat.
Na ka liang ki nongkitkam kitei ki arseng ki la kitbok kitrwiang ïa ki khynnah skul ba kin ïoh kham kloi ïa ka jingkoit jingkhiah bad ba kin ïoh ban bteng ïa ki jingpule ne ba kin lah ban leit phai sha la ka jong ka jylla.
Ka NPP bad NPYF ha ka kyrwoh khubor ki la ong ba kin ïaibteng ban shakri ïa ki paidbah ha kano kano ka liang khnang ba ka jylla Meghalaya kan kiew ha baroh ki liang kumjuh ruh ka ri hi baroh kawei.
