Ïathir jingmut ki samla pule halor ka One Nation One Election ha ka Youth Parliament

Mawkyrwat, Lber 21: Ki samla pule jong ki ar tylli ki shlem ai jinghikai ïa ka jingnang jingstad kata ki samla NSS jong ka St. Xavier’s College, Umoid bad ki samla pule jong ka Sngap Syiem College Mawkyrwat ki la pynlong ïa ka jingïathir jingmut halor ka One Nation One Election jong ka Viksit Bharat Youth Parliament ba la pynlong ha ka Conference Hall jong ka Sngap Syiem College, Mawkyrwat, South West Khasi Hills District.
Ha kane ka prokram Viksit Bharat Youth Parliament la ïashimbynta da ki 23 ngut ki samla kynthup iaki samla NSS jong ka St. Xavier’s College Umoid bad ki samla pule jong ka Sngap Syiem College Mawkyrwat. Ym tang kata, kane ka prokram ka long kum shibynta ban jied ïa ki 10 ngut ki samla pule napoh ka South West Khasi Hills District ki ban sa leit sha ka State Level ban ïoh ïa shimbynta hapoh ka parliament na ka bynta ka Viksit Bharat Youth Parliament ïa kaba ka thong jong ka Sorkar India ha u snem 2047 ka long ban pyntrei ïa kawei ka mat treikam na ka bynta ka ‘One Nation One Election’.
Lah ban kdew ba ha kane ka prokram, ki samla pule jong ki ar tylli ki jaka pule ki la pyni bad sei ïa la ki jong ki nia ha kaba ïa dei bad ka jingthmu jong ka Sorkar India na ka bynta ka ‘One Nation One Election’ ha u snem 2047 bad ha kane ka jingïamir jingmut ki Samla pule ki la pynsngew ha la ki jong ki jingnia bad ki jingïohi ki jong ki, ba lada pyntrei kam ïa ka ‘One Nation One Election’ ka long kaba biang bha ha kiba bun ki bynta ha ka shynshar khadar jong ka Ri baroh kawei.
Shuh shuh don ruh samla pule kiba la wanrah ïa ki mat ba ka ‘One Election One Nation’ ka wanrah ïa shibun ki jingeh ha baroh ki liang la ha ka shynshar khadar, ha ki jinglongtrai, ki rukom im jong ki jaidbynriew bapher bapher kum ki jaidbynriew rit paid bad ki ‘riew lum kiba don hapoh ka Ri India bad kan ktah ruh ïa kiwei de ki seng saiñ pyrthei kum ki party Riewlum kiba don hapoh jong ka Ri India hi baroh kawei.
Ha kane ka sngi la sakhi da u bah D. Rapsang uba dei u Deputy Director jong ka NYK’s Shillong, u Dr. K.K. Nongsiej, Principal Sngap Syiem College ha kaba na ka liang jong ki ki la ai ki kyntien jingkitbok kitrwiang ïa ki samla pule ki ban sa shah jeid ban mihkhmat napoh South West Khasi Hills District sha ka State Level bad na ka State sha ka National Level bad kyrmen skhem ruh ba kin lah ban shah jied ban leit ïashimbynta hapoh ka Parliament ha Nongbah Delhi.
Kiwei de kiba la ïadonlang ki long u bah H.S Diengdoh bad ki Nonghikai kum ki nongbishar ïa ki samla kiba ibit ban phah napoh ka distrik sha ka State Level.