Shillong, Ïaïong 02 : U Samla Jovial Andre Laloo ba 30 snem ka karta ba shong ba sah ha Mawprem EKHD, u la leit ban ïashim bynta bad mihkhmat ïa ka Jylla Meghalaya sha ka jingïakob ïalehkai Paragliding ha Himachal Pradesh.
Ïa katei ka jingïakob ïalehkai Paragliding kaba la tip kum ka Paragliding Accuracy Pre World 2023 ba la pynïaid da ka tnad Tourism jong ka Jylla Himachal Pradesh kan sdang naduh ka 5 tarik haduh ka 9 tarik mynta u Ïaïong ha Bir Billing, Himachal Pradesh.
U samla Jovial haba ïakren bad u Mawphor lyngba ka phone, u la ïathuh ba u la mih na la ka jong ka jylla ha ka 13 tarik Lber ban kilan met lypa shuwa ban sdang katei ka jingïakob. “Nga lah mih na la ka jong ka Jylla naduh ka 13 tarik bad nga poi shane (Himachal Pradesh) ha ka 14 tarik Lber, namar nga hap ban kilan met lypa shuwa ban poi ka sngi jingïakob,” ong u samla Jovial. U samla Jovial udei tang ma u marwei napoh ka Jylla Meghalaya ban ïakob ryngkat ki 10 tylli ki ri kiba ïashim bynta ha katei ka jingïalehkai.
“Na Jylla Meghalaya nga dei tang marwei bad nga hap ban ïakhun ïa ki nongïalehkai jong ka India bad ki nongïalehkai jong ki khyndai tylli ki ri jong ka pyrthei,” u la ong.
U Jovial u la ïathuh ruh ba ka jingleit ïashim bynta jong u ha katei ka jingïakob, u la pynlut hi nalade ïa ki jingdonkam, ki jinglut jingsep kynthup ka bai rung kaba kot sha ka T. 10 hajar. “Ha ka jingshisha shuwa ba ngan poi shane (Himachal Pradesh) nga la leit ban ïakynduh ïa ki director jong ki tnad Sorkar hynrei namar nga khlem ïoh kano kano ka jubab bad namar ba ka por kam shah shuh ba nga hap ban poi noh shane (Himachal Pradesh) ban kilan met, kumta nga la hap ban pynlut hi ïa ki jingdonkam,” la ong u Jovial.
Shuh shuh u samla Jovial u la ïathuh ruh ba lada jia ba u jop ha katei ka jingïakob ha Himachal Pradesh, un shah jied ban mihkhmat ïa ka ri India ha ki jingïalehkai International. “Lada jia ba nga lah ban pyndep ïa ka thong kaba la buh ban jop ha katei ka jingïakob, ngan sa ïoh ka lad ban mihkhmat ïa ka ri India ha ka ka World Cup. Kane ka jait jingïalehkai ka long kaba eh bha namar ba ngi hap ban ïakhun ïa ka jinglong jingman jong ka suiñ bneng, naei ka beh ka lyer bad ka jingkynjang, ngi donkam ban don ka sap kaba paka bha bad ka jingpyrshang ban kilan met man ka sngi,” ong u samla Jovial Andre Laloo,
Haba phai sha katei ka jaka ïalehkai Paragliding ha Bir Billing-Himachal Pradesh, kadei ka jaka ïalehkai kaba wan ba ar ka jingjrong ha ka pyrthei kaba ka jingkynjang jong ka ka long 5000 phut bad 8000 phut na sla duriaw. Ka Bir kaba dei kawei na ki shnong rit kaba don ha ka jylla Himachal pradesh kadei ka jaka ban pyndep ïa ka thong. Ïa katei ka jaka la ju tip kum ka Paradise jong ka jingïaïalehkai Paragliding jong ka India. Yn ñiew nongjop ïa ki pilot kiba lah ban poi beit tiap ha ka jaka pdeng (bull’s eye) ba la pruid laiñ.
Watla ka jingïalehkai ka don bun round, ki pilot kiba poi sha katei ka thong lane lada ki poi kham hajan jong ka jaka ba la pruid laiñ, yn ñiew nongjop ïa ki lyngba ki jingïoh khur poiñ.
