Shillong, Ïaïong 02 : Ka lympung ïalehkai kaba lai sngi ïa kaba la tip kum ka Elite Pathway Programme Camp ka la sdang naduh ka 1 tarik u Ïaïong, 2023 ka la ïaid shaphrang ha ka sngi U Blei ha madan ïalehkai jong ka SAI Centre kaba don ha NEHU, Shillong. La pynlong ïa kane ka lympung ïalehkai da ka Meghalaya State Olympic Association (MSOA) ha ryngkat ka jingïatreilang bad ka tnad Sports and Youth Affairs jong ka Meghalaya ha kaba la sakhi lang da u Myntri ka Sorkar Jylla u Bah Alexander L Hek uba la long kum u Kongsan.
U Chief Secretary jong ka Sorkar Jylla u Bah Donald P. Wahlang uba la long kum u Symbud Kongsan, ki nongiïalam jong ka Meghalaya State Olympic Association ba kynthup ïa u Working President u Bah John F. Kharshiing bad u General Secretary u Bah Finely L Pariat bad kiwei kiwei.
U nongai jinghikai lane u chief resource persons ha kane ka sngi u dei u Australian Olympian barim u Ian Campbell uba mihkhmat ïa ka 0EDGE10 bad u Jesper Olsen.
Ha kane ka sngi, la pynlong ïa ki jingïalehkai ban ïohi ïa ka sap jong ki khynnah ba kynthup ïa ka vertical jump, ka ‘compass drill’, ka jingmareh kaba 10meter bad kaba 20 minit.
Ki nongïalehkai kiba la shah khot ha katei ka prokram kidei ki 200 ngut kiba la shah jied kum kiba tbit napdeng ki 4500 kiba la dep ban ïashim bynta ha ki prokram ba la dep ha ki District Level. Ki la shah jied katkum ka jinglah jong ki ban ïalehkai bha.
Haba ai jingkren ha katei ka sngi, na ka liang u Bah AL Hek u la ong, “Ngam pat ju ïohi ïa kaba kum kine ki jait ai jinghikai kiba lah ban pynithuh ïa ki sap jong ki nongïalehkai jong ka Jylla. Ha ki snem ban wan nga kyrmen skhem baroh phin sa long ki khlur jong ka Jylla, da kaba phin wanrah ki takma, ka nam bad ka burom na ka bynta la ka jong ka Jylla, ka shnong ka thaw bad ïa ka ïing ka sem. Nga kyrmen skhem ruh ba ka Jylla kan sa ïoh ban pynmih ïa ki nongïalehkai kiban sa ïashim bynta ha ki jingïalehkai international.
U Bah Wahlang u la ong ba ki nongïalehkai ki donbok shibun ban ïoh ïa kiba kum kine ki jait ai jinghikai lyngba ki kor ki bor ka juk ba mynta bad ruh hapoh la ka jong ka Jylla. U la pynkynmaw ruh ïalade ha ki 40 snem ba lah dep ha Patiala hynrei u la ong ba ha kato ka por ki kor ki bor kim pat da biang kumba long ha kane ka juk kaba mynta.
Katba na ka liang u Bah John F Kharshiing haba ai jingkren shakhmat, u la ai khublei ïa ka Sorkar Jylla kaba la bteng ban ai jingkyrshan pisa ïa kane ka prokram bad kumjuh ruh lyngba ka jingïarap ka sorkar da ki scolarship na ka bynta ki nongïalehkai ka Jylla kiba jop takma ha ki jingïalehkai bapher bapher.
U Bah Paia B War Nongbri uba dei u Assistant Director of Sports and Youth Affairs, ha ka sngi U Blei u la leit ban ai mynsiem ïa ki nongïalehkai. U Ian Campbell haba ai jingkren u la ïathuh ba lyngba kane ka prokram, ki la mih shibun ki nongïalehkai donsap bad kyntu ïa ki nongïalehkai ba kin dang ïakhun tyngeh khnang ba kin nang lah ban kiew shaphrang.
