Shillong, Nailar 19 : U Myntri Rangbah, u Conrad K Sangma mynta ka sngi ula leit ïuhkjat ha shnong Banuin ha Upper Shillong, ban ïashim bynta ha ka jingbuh maw nongrim ban tei ïa ka kynroh jong ka Ophis treikam Ka Seng Bah Nongshad Nongkheiñ Hynniewtrep Hynniewskum. U MLA ka Mylliem Constituency Bah Ronniew V Lyngdoh ula ïadon lang ha kane ka jingïalang.
Haba ai jingkren, u Myntri Rangbah, Conrad K Sangma ula ong ba kane ka jingïalang mynta ka sngi kam dei tang halor ka jingbei tyngka CMSDF hynrei ka ïaid bad pynbteng ïa ka jingkut jingmut ka Sorkar ban bat, ïada bad kyntiew ïa ka dustur tynrai, ka riti dustur bad kham kongsan, ka jingithuh ba kyrpang jong ki briew.
“Nga kmen bha ban ïohi ïa ka kynhun Wangala kaba wan hangne bad shad ha kane ka prokram. Nga sngew ka dei kaba rit bha hynrei ka khubor kaba khlaiñ ba phi la ai sha ki briew jong ka Jylla bad nga ai khublei ïa phi na ka bynta kane” ula ong haba ban jur halor ka dor jong ka jingieid ïa la ka jong ka Jaidbynriew bad ka tynrai haba kheiñ kor ïa ka dor jong ka jingïatylli.
“Ka dei tang da ka jingïatylli bad jingburom bad tang da ka jingïatreilang ba ngin lah ban jam shakhmat kum ka imlang sahlang bad kum ka Jylla. Nga kyrmen ba kane ka jingïalong shipara, jingieid, burom bad jingïatylli kan ïai bteng ban suhthied” ula ong.
Ka Seng Bah Nongshad Nongkhieñ, ka dei kaba la seng ha u snem 1982 ha Madanrting Shillong. Hadien ka jingseng ïa ka, ka Seng kala thied ïa ka jaka ha Baniun lyngba ka jingïanoh synniang ki Rangbah, bala tip kum “Ki Riew Tynmen” ha ryngkat bad ki dkhot ka Seng bad la buh kum ka Headquarter jong ka Seng bad bteng ban shakri kum ka jaka ban trei ïa ki kam ka Seng.
Ka jinglut jingsep jong kane ka project shna kynroh ka long 41,69.260, tyngka bala bei tyngka lyngba ka Chief Minister’s Special Development Fund 2025-26.
Ka jingthmu bad ka thong ba hakhmat eh jong ka Seng Bah Nongshat Nongkheiñ ka long ban ïarap bad btin lynti ïa ki paid Khasi kiba dang bud ïa ka Niam Tynrai. Ka Seng ka kwah ban tyngkai bad ai ïa ki jingtip shaphang ka rukom pynïaid ïa ka niam ka rukom, ka jingleh niam na ka bynta ka jingmyntoi jong ki Longïing bad ka Jaidbynriew haba btin lynti ruh bad ai jingïarap ïaki riewshimet bad ki longïing ha kylleng ka ri-lum Khasi bad Ri-Bhoi, bad ïano ïano kiba kwah ban tip bad pan jingïarap na ki Riew Tynmen, ki nongshat nongkheiñ kiba ïadon bynta bad ka Seng.
Ki dkhot ka Seng ki ai jingïarap ruh ïa ki briew kiba don ka jingshitom na ki jingpang bapher bapher lyngba ka jingduwai tynrai, ka knia ka khriam bad kiwei kiwei.
