Ha baroh ki seng saiñ hima ki don beit ki jingïapher jingmut hynrei donkam ban pynbeit: President UDP

Shillong, Nailar 19 : U President jong ka United Democratic Party (UDP), Bah Metbah Lyngdoh ha ka sngi Balang u la ong ba haman la ki party ka jingïapher jingmut ka don beit hynrei dei lyngba ka jingïakren kaba lah pat ban pynbeit.
Haba kren bad ki lad pathai khubor hadien ka jingïalang jong ka Central Executive Committee (CEC) u Bah Metbah u la pynpaw ba kane ka mat kam dei shuh kaba phylla namar ka jingïapher jingmut ka ju don beit ha man la ki iing lane ha ka party ruh kumjuh.
“Ha kano kano ka ïing ne party, ka jingïapher jingmut bad ka jingïapher ka jingsngew ka ju don beit. Hynrei ka party ka ai lad ïa baroh ban kren, ban ïa sngap bad ban pynbeit ïa ki,” u la ong.
U la pynshai ruh ba kino kino ki rai kiba kongsan kin sa shim hadien ka jingïakren bad ka jingïasngewthuh bad baroh kiba don ka bynta bad ka party.
“Ïathuh ïanga lada don ki party kiba ym don ka jingïapher jingmut lane kino kino ki jingsngew. Baroh kin don beit bad kumta haba kum kine ki mih ngi ju ai ka lad ba ngin ïoh ban ïasyllok lane ban pynbeit,” u la bynrap biang.
Katkum ka jingong jong u, ki don bun ki lad ki lynti ban pynbeit ïa kine la ka long naduh ki jingïalang jong ka party, nangta ha ka CEC bad bun kiwei kiwei ki rynsan.
Ha kawei pat ka khubor, u President ka party u la pynpaw ba um tip ei ei ïa ki khubor kiba phriang ba don ki MLA na ka UDP kiba thmu ban leit ïasoh sha ka BJP. “Ngam tip ei ei ïa kane. Kumta lada don kino kino kiba la kynnoh kumta, dei ban pynpaw ïa ki kyrteng jong ki khnang ba ngin lah ban ai ka jingpynshai kaba biang.”
Shuh shuh haba pynshai halor ka jingleit jong ki MLA sha Delhi, u Bah Metbah u la ong ba na ka liang u Bah Lahkmen Rymbui ba dei ruh u Myntri Sorkar ka Jylla u la dep ban pynshai halor kane.
U la ong ba kawei na ki mat kaba kongsan jong ka jingïakren ha Delhi ka dei ka FCRA ha kaba ki MLA ka party ki la leit ban kynduh ïa u Myntri Kampohiing ban pynsngew bad ruh halor kiwei pat ki jingeh kiba ïadei bad ka jylla.
U la ong ba ka jingïakren markhmat ka la ai lad ïa ki ban pynsngew ïa ki jingeh kiba ka jylla ka ïakynduh bad kiba ktah ruh ïa ki katto katne ki bynta jong ka imlang sahlang.