Shillong, Nailar 19 : U Myntri Rangbah, u Conrad K Sangma, mynta ka sngi, ula buh ïa u maw nongrim na ka bynta ban tei ïa ka Veterinary Hsospital ne ka Hospital ban sumar ïa ki mrad kaba nyngkong eh ha ka Jylla ha Upper Shillong ha ka jingïalang ba la pynlong ha INDO DAN Guest House, Upper Shillong.
Kiba la ïadonlang ha ka jingïalang ki long u Myntri ka Tnad Animal Husbandry & Veterinary, Bah Sanbor Shullai, MLA ka Mylliem Constituency Bah Ronnie V Lyngdoh, u Chief Secretary Dr Shakil Ahammed bad ki Ophisar na ka Tnad AH& Veterinary.
Haba ai jingkren, u Myntri Rangbah u Conrad K Sangma, ula ban jur ïa ka jingdonkam ban don ka rukom treikam kaba kynthup ïa baroh ki bynta ba palat ban ïa ki skhim shimet ha ka Tnad Veterinary da kaba phai khmat halor ka jingsumar ïa ki mrad bad wanrah ïa ka rukom treikam kaba ryntih.
“Ka jingthmu ba kham heh bad ka thong ka long ban thaw ïa ki lad kamai jakpoh bad ban pynduna ïa ka jingïapher ha ka jingdawa bad jingshalan lyngba ki jingpyrshang kiba la pynbeit ryntih” ula ong.
U Myntri Rangbah ula ñiew ïa ka State Veterinary Hospital kum ka hub bad ki district bad sub division headquarter kum ki spoke bad bynrap “Ka hospital kan ym lah ban treikam lada ngim don ïa ka hub bad ki spoke ban pynkhlaiñ ïa ki jingtei bad jingdonkam kum ki machine, ki tiar sumar, ki dawai, ki briew ha man ki kyrdan”. Ula ban jur ruh ïa ka jingkongsan ban kynjoh ïa ka thong da kaba pyndep kawei hadien kawei ka kam.
Haba pynkut, ula ban jur ïa ka por pyndep kaba shai bad ka jingtrei kaba bha ha kane ka project. “To ngin pynthikna ba kane ka Veterinary Hospital kan dei kawei na ki hospital kiba biang eh bad ka jaka wadbniah ha ka jingsumar ïa ki mrad hapoh ka thaiñ Shatei Lam Mihngi baroh kawei” ula ong.
Ka State Veterinary Hospital ka dei ka jingbei pisa kaba kongsan ba jan kot 65 klur tyngka ha ka jaka ba 161 hectacre jong ka Tnad, kaba batai ïa ka jingkut jingmut jong ka Sorkar halor ka koit ka khiah ki mrad, ka jingkiew shaphrang jong ki nongri jingri bad ka ïoh ka kot ki nongkyndong ba shaniah halade.
Ka State Veterinary Hospital ba don mynta, ka la shakri ïa ka Meghalaya la bun sien, hynrei kala ïakynduh jingeh namar ka jingrit ka jaka bad jingbym lah pynbiang ïa ki tiar ki tar. Palat ïa 25% ki mrad ba ai jingsumar man ka sngi ki dei kiba phah wan na kylleng ki bynta ka Jylla, ka dak ba shai ba donkam ïa ka jaka ai jingsumar kaba heh, kaba khlaiñ bad kaba long kat kum ka juk ba mynta.
Kane ka State Veterinary Hospital ba thymmai kan tyrwa ïa ki jingsumar kat kum ka juk mynta, ki jingsumar da ki doktor specialist, ka radiology bad Imaginh, surgery, orthopaedics, inpatient services, laboratory bad pharmacy ki ban long baroh ka kawei ka tnum nalor ka 24×7 emergency care bad kiwei kiwei.
