Jowai, K’Lyngkot 25: Ki dkhot bad nongïalam jong Ka Synjuk Waheh Chnong Jowai kum shi bynta na ka jingrakhe ïa ka Republic Day hynnin ka sngi kila hiar sha ka shnong Nartiang na ka bynta ban lehkmen sngewbha bad ai jingïarap ïa ki 14 ngut ki khunswet kynthei kiba la ri bad sumar da ka World Mission Children’s Home (Girls) ha Nartiang.
Ïa kane ka Synjuk kala leh hadien ba ka la ïohbor na ka ophis jong u Deputy Commissioner West Jaiñtia Hills District. Ha shwa ban sam ïa ki mar bam bad mar kawei ka Kombol sha kitei ki khynnah kala don ka jingïalang kaba lyngkot ba la pynïaid da u President ka Synjuk u ma Alan Niangti. U ma Niangti ula pdiang burom ïa baroh ki dkhot jong ka Synjuk kiba la ïapoi lang bad ruh ïa ki nongpynïaid bad nongsumar jong kine ki khynnah khunswet.
La ïoh ïa ka jingkren lyngkot na ka kong Sonia Pala kaba dei ka Superintendent jong kane ka jaka ri khunswet, kaba la ïathuh lyngkot ruh ïa ka khana naduh bala sdang ïa kane ka jaka ri khunswet ha u snem 2018 bad hapdeng ka jingïaid lyngti kaba eh.
La ïoh ruh ka jingkren na u General Secretary ka Synjuk u ma Riquoma Rq. Laloo, uba la kren shaphang ka jingmut jong ka sngi Republic Day bad ula ai khublei ruh ïa ka District Administration, West Jaiñtia Hills kaba la ai bor ïa ka Synjuk ban pyndep ïa kane ka prokram.
U ma Laloo ula ai mynsiem bad sneng kyntu ïa baroh ki khunswet da kaba ong ba kim dei ban sngewkhunswet ïalade namar hangne ki don ki nongri nongsumar kiba long hi kum ki kmie ki kpa jong ki. U la pynpaw ba ka Synjuk ka kloi ban ai ka jingïarap ha kino kino ki por ba ki donkam.
U la ban jur ba kin long ki khynnah kiba don akor burom naduh ka jaka sah haduh ha bar kumjuh, khnang ban ïoh ka jingïaroh na ki ba bun ba lang. Ula kyntu ruh ïa ki nongri nongsumar jong kine ki khunswet ba kim dei ban peit shilliang ïano ïano hynrei ban ri bad sumar salonsar ha baroh ki liang.
La ïoh ruh ka jingkren ai khublei na u ma James Pohsngap uba dei u Asst. Waheh Chnong ka Khim-U-Sniang. Hadien kane la ïoh ïa ka jingsam ïa ki tiar sha kine ki khynnah da ki Waheh Chnong bad ki nongri nongsumar jong ki khynnah.
