Leh klet ka Sorkar ïa ka shnong Bataw ha ka jingshna ïa ka surok Four Lane

Khliehriat,K’lyngkot, 05: Ka jingthmu jong ka Sorkar ban shna ïa ka surok Four-Lane ha rilum Jaiñtia la shem ba ka Sorkar ka la leh klet bad leh lyndet ïa ka Dorbar Shnong Bataw, East Jaiñtia Hills District khlem da kynthup satia ha ka thup jong ki shnong ki ban sa shah ktah katba la sngewthuh bad tip shai pat ba ki don bun ki khlaw jong ka shnong Bataw kiba hap ban shim ha ka por ba shna ïa ka surok saw laiñ.
Ha ka shithi ba la phah sha u Deputy Commissioner jong ka East Jaiñtia Hills District ha ka 13 tarik, Nohprah, 2024 ba la soi da u Waheh Shnong jong ka shnong Bataw u Bah Deihok Sumer, la pynshai ba ka shnong Bataw kam shym la shah kynthup lang ha ka thup jong ki shnong ki ban sa shah ktah ha kaba shna ïa ka surok Four-Lane. Ym tang katta ka Dorbar Shnong ka la pynpaw ruh ka jingsngewlyngngoh kaba khraw halor ka jingkyntait bad leh klet jong ka Sorkar ban khot ïa ki bor pynïaid shnong jong ka shnong Bataw sha ka jingïalang ba kyrpang ne ka Review Metting katba ki laiphew wei tylli ki Dorbar Shnong kiba kynthup ki shnong ba marjan bad ka Bataw ki la shah khot sha ka jingïalang na ka bynta ban pynshai ïa ki jaka ne ki New Alignment na ka bynta ban shna ïa ka surok kaba hapoh ka project jong ka National Highways and Infrastructure Development Corporation Limited (NHIDCL).
Ka jingleh klet bad leh lyndet jong ka Sorkar ïa ka Dorbar Shnong Bataw ka la pynbitar bad pynlyngngoh jur ïa ki nongpynïaid shnong bad ïa ki paidbah jong ka shnong Bataw bad ki la ong ruh lada ka Sorkar ka dang leh klet ban kynthup lang ïa ka shnong Bataw na ka liang ka shnong kin sa shong pyrkhat bad leh da kumwei pat.
Ha ka jingïalang ba dang shen, ha ka prokram Village Development Programme kaba dang shu dep pynlong ha ka 24 tarik Nohprah, 2024 ha shnong Bataw, u Waheh Shnong u la kren bad ban jur halor kane ka jingleh klet bad leh lyndet ka Sorkar ïa ka shnong Bataw ha kaba ka shnong ka khlem kynhtup lang ha ka thup jong ki shnong ki ban sa shah ktah ha ka por ba pyntrei ïa ka surok Four-Lane bad ha ka jingïalang u Bah Sumer u la kyntu ïa u Deputy Commissioner uba la don lang ha ka jingïalang kum u kongsan ba un shimkhia ïa kane ka kam ban kynthup lang ïa ka shnong Bataw ha ka thup jong ki shnong ki ban sa shah ktah ha ka por ba pyntrei ïa ka surok.
U Bah Sumer u la ong ba u la ïoh ïa ki jingtip kiba tikna bha na ki briew jong ka NHIDCL kiba la wan ban jurip ha shwa ban pyntrei ïa ka surok ha kaba ki la ïathuh ruh ba ka shnong Bataw ruh kan sa shah ktah lada pyntrei ïa kane ka surok bad ki ban shah ktah ki dei ki khlaw ha ka shnong Bataw ha kaba ka surok ka dei ban ïaid lyngba na ki khlaw shnong Bataw kaba long katkum ka jurip.
Ki laiphew wei tylli ki shnong kiba hap hapoh East Jaiñtia Hills District kiba don hapoh ka thup jong ka projek shna surok jong ka National Highways and Infrastructure Development Corporation Limited (NHIDCL) ki kynthup ïa ka shnong Tubersohshrieh, Tuberkmaishnong, Wapungskur, Mookhep, Ladrymbai Datsimpeiñ, Ladrymbai-B, Dkhiah East, Rymbai, Huroi, Sawat, Umsatai, Lad Wahwapung, Lad Lakadong, Wahsarang, Demlakang, Pynurkba, Deiñ Shalalu, Lakadong Ummat, Umladoh, Umrasiang, Umlatdoh, Borghat, Huroi, Lahaleiñ, Hingaria, Borsora, Lumphyllut, Kuliang, Umkiang, Ratacherra, Malidor.
Ha ka thup kyrteng jong ki shnong, la lap ba ka shnong Bataw kam don kyrteng satia kumta na ka liang u Bah Sumer u la ban jur ba ka Sorkar ka dei ban shim khia ïa kane ka kam ym ban shu leh klet bad leh lyndet ïa ka shnong.
U la dawa ruh ba dei ban kynthup lang ïa ka shnong Bataw ha ka thup jong ki shnong kiba sa shah ktah ha ka jingpyntrei ïa ka surok Four-Lane.