Nongstoiñ, K’lyngkot, 05: Ka lyer election na ka bynta ban jied ïa ki nongmihkhmat sha ka Ïingdorbar thaw aiñ jong ka Khasi Hills Autonomous District Council ka ban sa long ha u bnai ban wan, ka la sdang ban beh ha kylleng ki jaka hynrei ki seng saiñ pyrthei kim shym pat la pynbna lut ïa ki kyrteng jong ki kyrtong ki ban mih madan ha katei ka elekshon.
Haba phai sha ka Mawshynrut constituency ki kyrtong jong ki seng saiñ pyrthei kiba la pynthikna ba kin mih madan ki long u bah Birbor Riangtem na ka Voice of People Party , u bah Sraly Rashir na ka HSPDP, u bah Gardinal Sohshang na ka NPP, u bah Sranly Rongrin na ka UDP.
Katba na ka liang ka Congress pat ha ka jingïalang kaba la pynlong ha u bnai Nohprah jong u snem ba la dep ha Congress Bhavan New Nongstoiñ, ka jingïalang jong ka West Khasi Hills Block Congress Committee, ka la mynjur ban phah ïa ka kyrteng jong u bah Fourteenson Lyngkhoi sha ka Meghalaya Pradesh Congress Committee, ba kan ai ïa ka jingmynjur ïa ka kyrteng jong u kum u kyrtong MDC na ka Mawshynrut constituency.
Ha kaba ïadei bad ka tiket na ka bynta ka MDC na Mawshynrut, wat la ka jingïalang ka la mynjur ïa ka kyrteng jong u bah Lyngkhoi. Hynrei haduh kine ki sngi ka MPCC kam shym pat la pynbna ne pynthikna ba u bah Fourteenson Lyngkhoi un dei u kyrtong. Dang ha kine ki sngi ka kyrteng jong u bah Kodang Rashir ka la sdang ban saphriang sted bha ba hadien ba um shym la ïoh tiket na ka HSPDP u la mih noh bad mynta u lah ban aplai tiket noh na ka Congress.
U nongthoh khubor ha kine u la ïoh ban ïakynduh ïa u bah Kodang bad haba pyrshang ban twad jingmut na u ha kaba ïadei bad ka jingthmu jong u ban ïakhun ïa kae ka MDC elekshon, u bah Kodang u la kubur ba un ïakhun beit bad mynta u dang ap ïa ka jingmynjur jong ka MPCC ban ai ha u ïa ka tiket.
Haba pyrshang ban kylli ba hato ka MPCC ka lah ne em ban mynjur ïa u kum u kyrtong MDC, haba na ka liang ka West Khasi Hills Block Congress Committee ka la dep phah ïa ka kyrteng jong u bah Fourteenson Lyngkhoi ba un long u kyrtong MDC jong ka Mawshynrut, u bah Kodang u la ong ba ha ka jingsngewthuh jong u ka District Congress Committee ka don hok ban phah ïa ki kyrteng jong ki nong aplai hynrei kam lah pat ban mynjur ïano yn ai tiket.
U la ong ruh ba ka don ka jing ong na kiba bun ba lang ba na ka liang jong u president jong ka West Khasi Hills District Block Congress Committee u bah Bormanding Nonglang, um kwah satia ba ka MPCC kan pynkylla ïa ka tiket MDC jong ka Mawshynrut sha kiwei pat. Hynrei kata ka dei tang ka jingkwah jong u shimet namar ba ïa ka tiket hi ka rai kaba kut ka dei ka jong ki nongïalam jong ka jylla kata ka MPCC.
Nalor kata u la ong ruh ba u sngew thikna ba ka MPCC kan pynphai kylla sha u ïa ka tkiet MDC na ka Mawshynrut constituency, namar lajan baroh ki nongkitkam jong ki Block Congress Committee jong ka West Khasi Hills, kata na ka Nogstoiñ Block Congress Committee, Rambrai Jyrngam Block Congress Committee, Mawshynrut Block Congress Committee, ki ai ka jingkyrshan bad ki la pynsngew ruh sha ki nongïalam ka MPCC ba ha kane ka elekshon MDC dei ban mynjur ïa u bah Kodang Rashir kum u kyrtong.
U la ong ruh ba katkum ka jingsngewthuh jong u ka tiket MDC kan ym leit sha kiwei pat bad hadien ka 9 tarik mynta u bnai ki paitbah ka Mawshynrut ki la shai kdar u ei u kyrtong MDC na katei ka constituency.
Caption: Ki khun samla Garo kiba la shim bynta ha ka jingïakop shad bad rwai kum ka jinglehkmen Christmas bad snem thymmai.
