Shillong, Kyllalyngkot 16 : Kum ka jingburom ïa ka President jongka Ri India jong ngi, ka Droupadi Murmu kaba la wan ha ka sien kaba nyngkong eh ha ka jylla, mynta ka janmiet ka Sorkar Jylla ka la pynlong ïa ka jingïalang leh burom kyrpang ïa ka ha Raj Bhavan, Shillong.
La pdiang burom ïa ka President da u Lat ka jylla u Phagu Chauhan, u Myntri Rangbah ka jylla u Conrad K Sangma, ka Myntri ka Koit ka Khiah ka Dr M Ampareen Lyngdoh bad u General Secretary ka Synjuk ki Rangbah Shnong u Bah R Blah.
Haba ai jingkren, ka President Droupadi Murmu ka la ïaroh ïa ka jingitynnad jong ki sawdong sawkun ka mariang ka jylla Meghalaya bad ka la ai khublei ïa ka sorkar jylla bad ïa ki paidbah ka Meghalaya kiba la pdiang sngewbha ïa ka ha ka jingwan ha ka sien kaba nyngkong eh kum ka President ka Ri.
Ka la pynpaw ïa ka jingkmen halor ka jingplie ïa kiba bun tylli ki projek kam pynroi bad ka kyrmen skhem ba kane kan kyntiew ïa ka roi ka par jong ka jylla bad kan wanrah ïa ka roi ka par ïa baroh.
Ka President ka la pynpaw ba ka Meghalaya ka don ïa ka lad kaba khraw lyngba ka kam jngohkai pyrthei bad ka la ïaroh ïa ki projek kiba la pyntrei da ka sorkar jylla kynthup ïa ka jingsdang pyntreikam ïa ka Meghalaya Tourism Policy 2023 bad ban pynlong ïa ka International Tourism Mart ha Shillong bad ka la pynpaw ba kum kine ki sienjam kin ïarap ha ka ban pynsngewthuh ïa ka jinglah ka jylla bad ka thain shatei lam mihngi ha ka kam jngohkai.
Ha kaba ïadei bad ka ‘Act East’ policy jong ka sorkar India, ka President ka la pynpaw ba ka Meghalaya bad baroh ki jylla ka thaiñ shatei lam mihngi ki dei ban trei ha ka dur jong ka mishon ban pynthikna ban biang ka leit ka wan, ka ïohkam ïohjam bad ki jingtei kiba don ha ka thaiñ, da kaba phaikhmat sha ki jaka kiba kongsan khamtam haba ka thaiñ ka long kum ka khyrdop sha ka South East Asia.
Haba ai jingkren ha ka jingïalang, u Lat ka jylla ula ong ba ka jingwan ka President ka long ka histori bad ula pynpaw ïa ka jingsngewnguh halor ka jingleit plie ka jongka ïa ka Meghalaya Games kaba San ha Tura bad kumjuh ïa ka jingplie ïa ki projek kam pynroi da ka jingthmu ban kyntiew ïa ka ïoh ka kot jong ka jylla.
Ula bynrap ruh ba ka President ka la don ïa ka jaka ha dohnud jong ki paidbah da kaba leit sha u paidbah khamtam eh sha ki self – help group jong ki kynthei, ula ïaroh ba ka dei ka kynthei riewlum kaba nyngkong eh hapoh ka ri ka ban ïoh ïa ka burom ban long kum ka President bad kumjuh kum ka President kaba dang khynnah tam jong ka ri.
Katba u Myntri Rangbah ka jylla ula ai khublei ïaka President kaba la ai mynsiem ïa ki samla jong ka jylla da kaba plie ïa ka Meghalaya Games bad ka la long ruh ka President kaba nyngkong duh jong ka ri ban sah hapoh ka Raj Bhavan kaba dang shu dep plie thymmai ha Tura.
