Haba phi pan kam ngam don, hynrei ban kdew lynti nga kloi ban ïarap: Ollansing Suin

Lawbah, K’lyngkot 16: U Nongmihkhmat jong ka Mawsynram Constituency ha ryngkat ka jingïatreilang bad ka 67th Battalion CRPF Shillong, Polo Ground ha ka 16 tarik u Kyllalyngkot, 2024 ki la pynlong ïa ka jingai jinghikai ïa ki samla halor kumno ban rung ha ki kam shipai ne kam pulit kiba hapoh ka CAPFs jong u snem 2023 – 2024 kaba dei ka shatri jong ka CRPF, BSF, SSB, ITBT, AR, NIA, NCB & SSF bad ïa ka jingïalang la pynlong hapoh ka Multi Facilities Centre Lawbah, East Khasi Hills District.
Lah ban kdew ba ïa kane ka prokram la pynlong kum shibynta ban pynsngewthuh bad ban ai jinghikai ïa ki samla jong ka thaiñ Lawbah ha kaba kumno kin ïoh ka lad ka lynti ban rung ha ki kam shipai, kam pulit bad kiwei de ki jait kam.
U bah Ollansing Suin, MLA ka Mawsynram Constituency haba kren kum u kongsan u la pynshai ba ka jingthmu jong kane ka prokram ka long ban wanrah ka jingpynshai ha ki samla jong ka thaiñ Lawbah kumno ba kin lah ban ïoh rung ha ki kam shipai, pulit bad ki kam bapher bapher. U la ai jingmut ruh ha ki samla ba lada ki kwah ban rung ha ki kam bapher bapher kim dei ban shu ap mano ba wan ïarap ïa ki hynrei ki dei ban long ki samla kiba la pynkhreh lyngba ki eksam. “Ai um ïa nga, ngan ai tang ka um ban dih, hynrei lada phi ong pat ba phi kwah um bam shet, te ngan pyni keiñ ïa ka wah ba phin leit tong”, ong u bah Suin. Kumta ruh ka dei ba haba ki samla ki pan kam ban trei, ma u kum u MLA um lah ban ai hynrei ban kdew lynti u kloi ban ïarap kumba ka long mynta ka sngi ba u la shim ka rai ban wanrah ïa ki briew nabar jong ka Constituency ban long ki nongwan ai jinghikai ne kum u Resource Person.
“Ka kam ka jam ka don ha ki kti jong phi, lada phi don ka jingtrei shitom”, ai mynsiem u bah Suin ïa ki samla. Namarkata, u la buh ka jingkyrpad ïa ki samla ba lada ki kwah ban ïoh ki lad jingïarap bad ki lad jinghikai kim dei ban pynleh noh ei hynrei ki dei ban mih shakhmat ban shim ïa kabu ïa kaba na ka liang jong u kum u MLA u la wanrah mynta ka sngi.
Katba ha ka jingkren jong u P. Haokip, Inspector jong ka CRPF 67th Battalion Shillong, Polo Ground bad u bah H. Thabah, OC jong ka Mawsynram ki la ai bad pynsngewthuh ha ki samla jong ka thaiñ Lawbah ïa ki katto katne ki lad ki lynti kumno ban leh lad ki kwah ban ïoh rung ha ki kam shipai lane kam pulit. “Long kiba shaniah ha lade ym ha kiwei ha ka por ba ki don ki jingïaleh khamtam ha ki eksam bapher bapher, u bah H. Thabah, OC Mawsynram Police Station
Ha kane ka prokram ka la don ruh ka jingaisngew bha ïa ki kot pule sha ki samla wad kam kiba la wan sha ka jingïalang da u MLA ka Mawsynram Constituency bad kumjuh ruh ka jingshim ïa ki kyrteng jong ki samla ba kin ïoh shuh ki jinghikai ha ki ar sngi ban wan.
La pynïaid ïa ka jingïalang da u bah Reading Wahlang, Assistant Rangbah Shnong Lawbah, kren pdiang sngewbha na u bah Mightystar Lyngdoh, Co-ordinator Job Orientation Programme bad ka jingkren khublei na u nongpynïaid.