Nongpoh, K’lyngkot 16: Da ki hajar ngut ki khun samla ka Balang Katholik ba hap ha ka Zone-VI jong ka Shillong Archdiocese ki la tuid ha ka sngi U Blei sha Lumsinai Umden Parish ban sakhi ïa ka jingpynkut noh ïa ka lympung ïa kynduh lang ki khun samla ba ju pynlong man u snem na ka bynta ban wan rah ïa ka jingïatylli ki khun samla ban trei ïa ka kam jong u Blei bad kumjuh ruh na ka bynta ka imlang ka sahlang.
Kane ka 5th Zonal Youth Convention jong ka Shillong Archdiocese Catholic Youth Momenet ka Zone-VI ka dei ka lympung ïa kynduh lang jong ki 5 tylli ki parish ba kynthup ïa ka Umkadhor, Byrnihat, Nongpoh, Umden bad ka Umsiang Parish ha Ri Bhoi District bad da ki hajar ngut ki khun samla ki la wan ban sakhi ïa kane ka lympungbah jong ka jingïakynduh lang ki khun samla ha kaba kane ka lympung ka la sdang naduh ka 12 tarik u K’lyngkot bad la pynkut noh ha ka sngi u Blei kata ha ka 14 tarik u Kyllalyngkot.
Nalor ki khun samla ka Balang Katholik na ka Zone-VI, kiwei kiwei kiba la ïa sakhi lang ha kane ka jingpynkut noh ïa ka lympung ïakynduh lang ki kynthup ïa u Myntri sorkar ba dei peit ïa ka tnad Animal Husbandry, u Bah A. L Hek, u Fr. Peter Syiemlieh, SYD, SACYM Zone VI, Fr. Johny Epen, Fr. Micheal Khongngaiñ, Parish Priest Umden, Fr. Kmenlang Nongrum, Ast. Parish Priest Byrnihat, Fr. Primus Syiem, Fr. Nicholas Sun, bad Fr. Michael Sun, Parish Priest of Umkadhor ha kaba kynthup ruh naduh ki Katekis, ki rangbah balang bad kynthup ruh ki phadar bad ki sister.
Haba pynkut ïa kane ka lympungbah ki khun samla, ha ka por mynstep la sdang da ka mass bakhuid ryngkat ka lehniam ka lehrukom ba la pynïaid da u Fr. Johny Epen bad la sam pat ïa ka ktien ka jong u Blei da u Fr. Michael Sun, uba la ban khia bha katkum ka phang, “”U dieng u ba bha um ju sei ki soh kiba sniew lymne u dieng uba sniew um ju sei ïaki soh kiba bha” kaba ki la shimm katkum ka Gosper u Lukas 6:43.
Hadien ka mass bakhuid la bud pat sa ki program bapher bapher ba la shim bynta ki khun samla kiba kynthup naduh ki jingrwai, ki jingshad bad ki jingput jingtem ryngkat ki jinglehkmen shuwa ba ki samla kin leit phai noh sha ki ing ki sem bad ba kin long kita ki iktiar ban rah jingshai sha kiwei pat ki samla ba kum ki samla ka Balang ki dei ban long kita ki lawei babha jong ka Balang bad jong ka imlang ka sahlang.
