Leh burom ka CYC Laitumkhrah Presbyterian ïa samla pule bad nonghikai kiba la shongthait

Shillong, Nohphrah : Ka Christian Youth Centre jong ka Balang Laitumkhrah Presbyterian ha ka 17 tarik mynta u bnai ka la pynlong ka jingleh burom ïa ki samla kiba la leh bha ha ka ‘Tonic Solfa’ bad ha ka ‘Music’ bad kumjuh ruh ïa ki nonghikai kiba la kut noh ka jingshakri ha ka jingïalang bakyrpang ba la pynlong hapoh Christian Youth Centre Hall kaba don ha syndah jong ka ïingmane Laitumkhrah Presbyterian.
Haba kren ha ka jingïalang leh burom ha kane ka sngi, U Rev E.L.Kharmawphlang, uba pynïaid ïa kane ka jingïalang bad uba dei ruh u Director jong ka CYC u la pynpaw ka jingsngewnguh ïa U Blei halor ka jingnangroi jong ka jingdon ki samla kiba wan ban pyntbit ïalade bad kiba shah hikai ha ka Centre na u snem sha u snem.
Kumba ka long mynta ki samla kiba shah hikai ha ki trade bapher bapher ki long 135 ngut ha ka computer, 59 ngut ha ka tailoring, 15 ngut ha ka embroidery, 8 ngut ha ka stenography kaba ki dangcdhu sdang shuwa ka Covid-19, 18 ngut ha ka keyboard, 26 ngut ha ka keyboard bad guitar bad 3 ngut ha ka violin.
Ka CYC ka la lah ruh ban pynïoh ïa ka elementary course na ka bynta kito kiba kwah ban shu nang bad tip ban tem ha kiba la don haduh 63 ngut mynta u snem. Kumjuh ruh ha ka Tonic solfa ha kaba haduh 51 ngut ki samla kiba thrang ban shakri ïa U Blei da ka jingjingrwai ki hah pyntbit ïalade.
Shuh shuh ha kane ka sngi la ïoh ruh ka jingkren pdiang sngewbha na I Tbn. C Diengdoh, ka jingduwai sdang na I tbn. P Kharkongor. Nalor kata la ïoh ruh ka jingkren lyngkot na I Tbn P.S Rynjah bad ka jingkyrkhu pynwai na I tbn N.S.Nongrem.Ha kane ka prokram la pynsngew ruh ïa ka jingrwai ba kyrpang na I bah C T Swer bad ka special no na ka CYC Music School.