Shillong, Nohprah :Ka ASHA payment mobile application kaba nyngkong ïa kaba la plie paidbah da ka sorkar Meghalaya ha u bani Lber 2022, kala wanrah ka jingbha bad ka la pynsuk bad pynstet shibun ïa ka rukom siew.
Naduh ba la plie paidbah ïa kane ka app la dep ban siew haduh 12.2 klur tyngka sha ki nongtrei ASHA ha kylleng ka jylla.Nalor kata kane ka application kala pynduna ïa ka por ban siew ïa ki jingsiew sha kine ki nongtrei ka koit ka khiah na ka 120 sngi sha ka 5 sngi.
Da ka jingthmu ban pynsuk ïa ka rukom siew tulop bad ban pynthikna ïa ka jingsiew ha ka por ba biang sha ki nongtrei ASHA, ka sorkar Meghalaya kala plie paidbah ïa ka ASHA payment mobile application la kumba 9 bnai mynswa. Shwa ban lap ïa kane ka buit technology, ka jingsiew ka long ka ba slem bad eh kaba shim por palath 4 bnai eiei, nalor ba ka tuh ïa ka por, hap leit rah ïa ki kot ki sla bad ka rukom jingpynshisha.
“Ka sorkar jong ngi kala buh hakhmat eh ïa ka koit ka khiah bad uwei na ki rishot baskhem jong ka koit ka khiah ki dei ki hajar ngut ki nongtrei ASHA ha kylleng ka jylla. Kila shim ïaka mat ba kongsan ha ka ban wanrah ïa ka jingjop ïa ka Meghalaya pyrshah ïa ka khlam Covid-19. Da kaba pynsuk bad pynstet ïa ka jingsiew tulop ïa ki nongtrei ASHA ka long kaba rit tam kaba ngi lah ban leh ban siew kylliang ïa ki jinglen lade bad jingtrei shitom ka jong ki. Nga sngewkmen ba ngi la pyntreikam ïa ka buit technology ban plie paidbah ïa ka ASHA Payment App bad ban lah ban weng ïa ki jingeh bad jingjynjar jong ka rukom siew ulop ba palat 4 bnai sha ka hapoh shi taïew, kaba pynlong ïa ka ban kham pynsuk da ka kaba shu ñïon ïa u budam”, ong u Conrad Sangma, u Myntri Rangbah ka jylla haba ai khublei ïa ka kynhun baroh na ka bynta kane ka buit technology
Ka jylla Meghalaya, ïa kaba la ju bna nam kum kaba shim jait na ka kmie ka don palat 14 lak ngut ki kynthei haka jingdon briew. La pyntreikam ïa ka ha Meghalaya ha u snem 2005 da ka National Health Mission (NHM). Ki nongtrei ASHA ki dei ki kynthei kiba shakri hakhmat eh na ka bynta ki baduk bajynjar ha ki thaiñ nongkyndong. Ki don kumba 7,000 tylli ki shnong ha Meghalaya, ka jylla haduh mynta ka don 7067 ki nongtrei ASHA, ha kaba man la ki shnong ki don la kumno kumno iwei i nongtrei ASHA da ka jinggthmu ban ai ïa ka jingsumar kaba bha, ba tad bad bastet ïa ki briew ha nongkyndong. Ki nongtrei ASHA ki kwah ban kyntiew ïa ka jingtip paidbah bad ban ai ki jingpynbna halor ki jingdonkam ïa ka koit ka khiah kaba paka, kum ki jait jingbam batei, ka jingleh khuid bad ka jingkhuid jingsuba. Ki ju kren halor ka jingdonkam ban shim kabu bad pyndonkam hok ïa ki lad jingsumar ka tnad ka koit ka khiah.
La dep ban phah haduh 80 klur tyngka jong ki snem 2020 haduh 2022, kiba la sahteng la bun snem. La nang pynkiew ruh ïa ki incentive na ka bynta ki nongtrei ASHA bad ki nongïarap. Ka jingsiew ka jylla ïa ka tulop jong ki nongtrei ASHA bad ki nongïarap ka long 1500tyngka bad 500 tyngka shi bnai, bad ïa kane la pynkiew arshah kata 3,000 bad 1,000 tyngka. Mynta ka jingsiew ba ki nongtrei ASHA bad ki nongïarap ka long 7,500 bad 3,250 tyngka shi bnai.
Katkum u Additional DMHO, ka Ri Bhoi District, u Dr D Blah, “Hadien bala pyntreikam ïa kane ka payment application ha ka District, kala ai mynsiem ïa shibun ki nongtrei ASHA namar mynta ki lah ban ïoh ïa ki incentive man ka por bad khamtam ha ka por ba biang, ka bym ju long kumta mynshwa”
Ka Asha Mobile Payment Application kala long ka atiar bakongsan na ka bynta ki program official ha ki kyrdan baroh, namar ka lah ban ïarap ban tip bad buddien ïa ki jingsiew jong ki nongtrei ASHA bad ban pynthikna ba kan ym don ka jingpynslem ïa ka jingsiew ïa ka tulop jong ki. La sdang pyrshang nongkong eh ïa kane ka app ha Umlong Block ha Ri Bhoi District bad ïa ka pisa ba dei ban ïoh la pyllait sha ki nongtrei ASHA lyngba kane ka app hapoh 5 sngi naduh ka por ba pynmih ïa ka jingsiew tulop.
