Shillong, Nohprah, 29: U MLA jong ka North Shillong Constituency u Bah Adelbert Nongrum u la plie ïa u mawnongrim na ka bynta ban shna pynheh ïa ka surok ïaid kali kaba jrong kumba 500 mitar ha Jaïaw Umpohliew Block kaba hab hapoh ka Jaïaw Laitdom Dorbar.
Ïa kane surok kaba u la mang pisa na ka SUWP 2022-2023 la lah ban sdang noh mardor da ka jingthmu ban pyndep tang hapoh khyndiat por.
Ha ka jingbuh ïa u mawnongrim la sakhi lang da u Rangbah Shnong bad ki paidbah nongshong shnong.
Haba kren ha ka jingïalang, u Bah Adelbert u la ong, hadien ba u la jop kum u MLA ha u 2018 ka ladei ka jingai bor ki paidbah ban ïoh pyntyllun ïa kine ki kam pynroi bad bynrap ba ha kane ka ilekshon kaba dang ha ka jingpynkhreh ha u 2023 u la dep ban pynkhreh.
“Tang kawei ngan ong ba kaei kaei kaba pan ha baroh kawei ka Constituency nga la lah ban pyndep lut la kaba rit ne ba heh bad khamtam eh nga ainguh ïa U Blei ba lyngba jong phi nga la ïoh ban long MLA na kane ka Constituency khlem da kit ram bad kam donkam ka shuki ïa ka ban ïasylla ne pynkit ram ïa ka Constituency bad jylla baroh kawei,” ong u Bah Adelbert.
U la ong ba kum u MLA um don por ban peit ïa kiba kyrshan ne bym kyrshan hynrei namarba la long MLA hap peit lut ïa baroh ki jingdonkam ym ïa ki jingkwah bad ban peit ïa ka roi par ym pat ka roi ha ki kam bymman namar ka jylla ka la kynjoh 50 snem hynrei ka dang duna ha ka Koit ka Khiah, ka Pule puthi bad khamtam ki samla bun kiba khlem kam khlem jam.
U la ai khublei ïa u Myntri ka tnat PWD (R) u Bah Prestone Tynsong uba la shimkhia la slem, ïa ki trai jaka kiba la ai ka jaka ban pynheh ka surok da ka jingnoh synñiang ïa ka khyndew.
“Nga long uba la khreh ban pynbiang ïa ka kaiphod na ka bynta ki ki jingtreikam jong nga kum u MLA ha kine ki san snem bad nga ngeit skhem ruh ba kan ym don ka jingleh politik haba pyntrei ïa kane ka kam namar ka dei na ka bynta ka bha ka miat jong ki nongshong shnong,” ong u Bah Adelbert da kaba bynrap ba donkam ban don kine ki Bye lane, Sub-lane, ki lynti ïaid kali khnang ban weng ïa ka dheng kali.
U la ong ba u kmen ruh ba bun na ki shnong ki ai ka jingïatreilang ban pyntyllun ïa ki kam pynroi ha ki shnong ha kine ki san snem ha kaba ki la ïaid beit ïaid ryntih khlem ka jingthut bad ong ruh ba kiwei pat ki shnong kim dei ban sngewsih lada don ki bym pat ïoh lynti ïaid kali, hynrei lada U Blei u dang ibit ban jop biang un sa nang pyndep ki kam ba dangsah.
Lah ban ong ba kane ka jingbuh mawnongrim ka long kaba kham pher ba tang ha ka sngi ba u MLA u plie ïa u mawnongrim ka kam ka la sdang noh mardor haba ïanujor bad kiwei kiba buh mawnongrim, wat ki Sorkar haba plie, ki don ki project ba arsien ki plie mawnongrim hadien bun snem kim pat sdang ïa ka project.
