Jowai, Rymphang 26: Ka Balang Presbyterian Khimusnaing Jowai mynta ka sngi U Blei kala leh burom ïa u Tymmen Basan S.O. Bamon uba la kynjop 25 snem jong ka jingshakri ïa ka Balang bad uba dang ïaibteng haduh mynta ki sngi wat lada um da don eh ha ka bor met kaba koit ba khiah.
La ïathuh ba ïa u ma S.O. Bamon la jied kum u Rangbah Balang ha u snem 1990, hynrei tang hadien katto katne snem kata ha ka 28.12.1997 ba la jied Tymmen Basan ïa u. U la ju bat shibun ki kam hapoh ka Balang, ïa ka kam Secretary ïingmane ha u snem 1990 ha ka por ba ka Balang ka dang donkam bha ban pynbha pynmiat ïa ki jingdonkam jong ka ïingmane.
Ula ju bat ïa ka kam Secretary ka Balang ter ter ha ka jingïaid ki snem, kum u Finance Secretary, u Vice-Chairman ka Balang ha kiba bun tylli ki snem, ula long ruh u Secretary ha ka snem 2008 ha ka por ba ka Balang ka pdiang ïa ka Jingïaseng Synod. Ula long ruh u Adviser jong ki Jingïaseng hapoh ka Balang naduh ka Jingïaseng Kynthei bad Jingïaseng Khynnah, kiwei de ki Sub Committee bad u Headmaster jong ka skul ka Balang.
Nalor kine ki kam hapoh ka Balang ula ju bat ruh kum u Treasurer ka KJP Synod kumjuh ruh ïa ki kam bapher bapher hapoh ka District bad ka Presbytery.
Halor kiba kam jong ka jingshakri ka Balang kum ka dak ban kynmaw burom ïa ki kam kiba ula dep ban synñiang hapoh ka Balang la pynlong da ki jingai sngewbha sha u TBn. S.O. Bamon naduh ka Balang, ki Jingïaseng Kynthei, Jingïaseng Samla, Jingïaseng Khynnah, Sunday School bad kumjuh na ka Skul jong ka Balang.
Na ka liang ka Balang ka ai ka jingkitbok kitrwiang ïa u TBn. S.O Bamon ba U Blei Trai kynrad un pynïoh ha u ïa ka bor met kaba koit ba khiah, ka jingstad jingshemphang khnang ba un dang lah ban shakri ïa U Blei ha ki sngi ban wan.
Ïa ka jingïaseng leh burom la pynïaid da u Pastor incharge ka Balang u Rev. K. Syiemlieh, la ïoh ruh ban sam ïa ka khubor na ka ktein jong U Blei da u TBn. P. Bamon uba la pynshong nongrim na ki Proverb 17:3 kaba kren shaphang ka jingkyrmen, ka jingïai ap bad ka jingaiei jong u Blei. La ïoh ruh ka jingrwai kyrpang na ka Choir jong ka Jingïaseng Samla.
