Haduh 151 ki kynhun ki nongpynïaid elekshon sha ki Polling Station bapher bapher ha East Jaiñtia Hills

Khliehriat rymphang 26 : Ki kynhun jong ki nongtrei sorkar kiba dei ban leit sha ki polling station, ki la sdang ban mih naduh hynnin ka sngi saitjaiñ bad ki la don haduh 151 tylli ki kynhun kiba la mih na Head Quarter na Khliehriat ban leit sha ki jaka thep vote bapher bapher na ka bynta kane ka Meghalaya Legislative Assembly Election, kaba yn pynlong ia ka jingthep vote ha ka 27 tarik u rymphang 2023.
Napdeng kitei ki 151 tylli ki kynhun, khat wei tylli ki kynhun, ki la mih naduh mynsngi saitjaiñ kiba leit sha ki shnong ba kham jngai kum sha Khongoi, Moulsei, Thuruk. Hingaria, Huroi, Lahaleiñ, Lrjri, Moullian, Moulsei-B, Moulhoi bad Saibual.
Ki kynhun (polling parties) jong ka 5-Sutnga Saipung Constituency (ST) Assembly Constituency bad jong ka 6- Khliehriat Constituency (ST) Assembly Constituency, ki la leit da kaba rah lang ruh ia ki Electronic Voting Machines (EVMs), Voters Verifiable Paper Audit Trails (VVPATs), lem bad ki jingdonkam baroh kiba donkam ha ki polling station bad la synran lang ïa ki da ki kynhun pahara haduh ba kin da poi suk sha ki jaka.