Nongstoiñ, Jymmang, 9: Ka jingksam marpoh khyndew ha Mawlangria kaba don hajan ka shnong Mawïawtep ka la ïaid la lai taiew kynthih bad ka jingkhihwin ki paitbah jong ki shnong ha katei ka thaiñ, ka la nang jur nang jur namar naduh ba sdang ki paitbah kim kwah satia ba ka jingksam marpoh khyndew ha katei ka jaka kan don.
Dei haduh hynnin ka sngi ba ki paitbah bad ki rangbah shnong jong ki hynñiew tylli ki shnong ki la lap ba ka jingbym sngap jong ki briew kiba ksam marpoh khyndew ha katei ka jaka ïa ka jingpyrshah ki paitbah ka dei namar ba ïa katei ka jing ksam marpoh khyndew la pyntrei da u bah Macdonal Lyngdoh, u ba dei u secretary jong ka hima Rambrai bad u la ïoh jingbit ruh na u Syiem ka hima Rambrai.
Katkum ka jinglap jong ki rangbah shnong, u Syiem ka hima Rambrai u la ai ïa ka No Objection Certificate kaba No.RS/Genl/11/2021-22 kaba Dated Rambrai 25th Jan 2022. U bah B.Kharmawphlang sordar shnong Urkhli, bah Trowel Kharjahrin sordar shnong Mawliehpoh, u bah S.Myrthong sordar shnong Mawthaw,u bah D.Lyngkhoi sordar shnong Mawmluh II, haba ïakren bad u nongthoh khubor, ki la ong ba ka jingai jingbit sop sop jong u Syiem ban ksam marpoh khyndew, ka la long ka jingïuhroit ïa ka hok jong ki paitbah.
Kat ban ai jingbit ban pyntrei ïa katei ka kam, um shym la pyntip sha ki sordar bad um shym la pynlong ïa ka jingpynsngew paitbah. Hynrei dei tad haduh ba ki kor ki bor bad ki mashin ki la poi ha katei ka jaka bad ka jingtrei ka la sdang ba ki paitbah ki sa tip.
Hadien ba ki la ïoh jingtip ki la leit ban jurip bad ki la lap ba ki nongtrei ki la don ha katei ka jaka bad kaba lyngngoh ka long ba ki don ki nongtrei bar jylla. Hynrei man ka step la wan buh ïa ki da ka kali ha katei ka jaka bad janmiet pat ka leit shaw ïa ki bad ka leit buh shaei ruh ym lah ban tip. Hynrei ki sordar shnong ki la suba jur ba u bah Makdonal u ba pyntrei ïa katei ka jingksam marpoh khyndew u la ai jaka sah sop sop hangno re hangno.
Ki sordar bad ki paitbah jong kitei ki shnong, ki la ong ruh ba wat la u Syiem u la dep ai jingbit bad ki bor District kim shimkhia ban phah sangeh ïa katei ka jingksam marpoh khyndew ha katei ka jaka, kin ïeng pyrshah beit namar ka la ktah haduh katta katta ïa ka umbam umdih kaba ki la ring na jan katei ka jaka. Ki la ong ruh ba haduh mynta ki dak ki shin kiba ktah ïa ka jingkoit jingkhiah ki dang paw ter shi ter ym tang ha ki khunlung khynnah hynrei kiha ki rangbah ruh.
U sordar jong ka shnong Urkhli u la ong ruh ba dang hynne mynstep tang mar shu dep sum na ka um kor kaba ka jaka ring um ka don harum jong katei ka jaka ksam marpoh khyndew ka met ka phad ka la shu dait buit. Ki sordar jong kitei ki shnong bad ki paitbah ki la ong ruh ba ka jingleh jong u Syiem, ka la pynsngewsih haduh katta katta bad ka pyni shai ba lada ki khun ki raïot jong ka hima kin dih da ka um kaba jngut bad kaba jakhlia kum ki sñiang ruh kam lei lei namar ba ïalade u bit u biang.
Ki la ong ba lada u Syiem um ñiew shuh ba ki paitbah nongshong shnong jong ka Mawmluh II bad Urkhli, ki dei ki khun ki raïot jong ka hima u dei ban da ong shai, khnang ba kin leit ïasoh noh bad kiwei ki hima. Namar ka rukom baroh ka long ba u Syiem ne ki rangbah shnong shuwa ba un leh ïa kano kano ka kam, u dei ban ïatai shuwa ha ka Executive Committee bad sa pynsngew ha ka dorbar paitbah la ki sngew dei ne em. Namar lada ki paitbah kim sngew dei u Syiem ne rangbah shnong un ym lah ban shu leh marwei ne synshar don bor, namar ka lah ban wanrah ïa ka jingbym shngaiñ ha ka imlang sahlang.
Ha kaba ïadei bad ka jingai jingbit sop sop, ki sordar jong ki hynñiew shnong ki la dawa ba u Syiem u dei ban pynshai sha ki paitbah bad lada um shym la shah thied hano re hano u dei ban pynduh pyndam noh ïa katei ka NOC lane un hiar noh shuwa na ka khet Syiem. Lada um leh kumta ki paitbah ryngkat ki sordar shnong kin ïaid da kawei pat ka lynti bad kin shim da ka sien jam kaba kham tyngeh.
