Lap ki Shipai Israel 40 ngut ki Khunlung ba la khrai khlieh ki lehnoh Hamas

Tel Aviv, Risaw 12: Ki Shipai Israel Defence Force (IDF) mynta ka sngi ki la lap ïa kiba bun tylli ki met ïap jong ki Jiw kiba la shah siat pathar ha ki lehnoh Hamas bad napdeng kine la don ruh 40 ngut ki Khunlung bad ki Khynnah kiba la shah mait ka khlieh. Kane ka pyni haduh katno ki Hamas ki la leh kum ki riewkhlaw haba ki la rung sha ki shnong ki thaw bad ki ïing ki sem ha ki shnong ha Israel.
Ki Shipai IDF kila lap ïa kine ki met ïap ha kapor ba ki rung sha ki shnong kiba la hiar thma da ki Hamas naduh sngi Saitjaiñ bad ïoh kurup biang ïa ki jaka kiba ha khappud bad ka Gaza na ka kti ki Hamas.
Ki nongthoh khubor jong ka pyrthei kiba don ha Israel, kiba la leit bud ïa ki shipai ki la ïathuh ba katno ka long kaba itriem bad i myllung ruh ban lap ba ki khun bad ki kmie ki kpa ki thiah lyngktar ha ki kamra jong ki ïing ki sem jong ki ha ryngkat ka jinglyngkien ka snam, kaba pyni ba ki lehnoh ki la rung sha ki ïing ki sem ban siat pathar bad leh kput beit kat ïa kiba ki lap.
Ha kawei na ki video ba la pyllait ha ki lad pathai khubor, la pyni ba wat ki shipai ruh kim lah khlem da jaw ummat haba ki ïohi ïa kane ka rukom pynïap riewkhlaw jong ki Hamas, kaba la pynlong ïa kiba bun ki ri ka pyrthei ban pynrem jur ïa kane ka mynsiem mrad ki Hamas.