Lap ka MPUF-EJHD ba khlem shimkhia ka NHAI

Khliehriat iaiong 19: Ki dkhot jong ka Meghalaya People’s United Front East Jaiñtia Hills District, hapoh ka jingialam u President u bah Kyrshan Blah, hynnin ka sngi ki la hiar ban jurip ïa ka thaiñ Sonapyrdi ban lap ba ka dang don ka jingdheng kali kaba jur bha ha katei ka thaiñ, ka seng ka kyrpad jur ïa ka sorkar Meghalaya bad ïa ka company National Highway Authority of India ba ka shim khia kloi ban weng noh ïa kane ka jingeh jong ki paidbah.
U bah Kyrshan Blah, u la ong ruh ba ka seng ka la lap ba don ka jinghap khyndew kaba jur ha ka jingtwa khyndew ha Sonapyrdi ha kaba ka NHAI kam shym la shim khia eiei ruh ban pynkhuid ïa ka surok, kumjuh ruh ka seng ka lap ba ka jingdheng kali ka la sdang biang naduh ka por 6 baje mynstep ha kaba ki kali ki la shu ieng da u laiñ bad buh jingeh haduh katta katta ïa ki nongleit nongwan.
Katei ka jingdawa jong utei u nongialam ka MPUF na East Jaiñtia Hills District, ba la dawa na ka sorkar bad na ka NHAI ban shim khia ban pynkhuid ïa ka surok, ka long ruh halor ka nongrim ba kiba bun ki paidbah kiba na ki jylla bapher bapher haduh mynta ki dang don kiba dang sahkut ha ka jingdheng kali, don ruh kiba wan lang bad ki khun kiba dang rit bad dang khynnah, kiba la shu shah ha ka jingthngan bad hapdeng u slap ba jur, ym tang katta, kane ka jingdheng kali ka la ktah ruh ïa ki kali kiba kit ïa ki mar bam mar dih kiba thmu ban pynpoi sha ki jaka ïew.
Ha kaba iakren bad ki dkhot jong ka seng ha Sonapyrdi, ki nongleit jingleit kiba na bar jylla, ki la pynpaw ka jingsngew khia bad sngew dukha jingmut haduh katta katta namar ka jingsahkut jong ki ha kane ka jingdheng kali kaba bun bun kynta bad iathuh ba ki la thngan bha bad tang ka um ban dih ruh kim ioh namar ba ym don ki dukan ha kata ka jaka ba ki sahkut ha ka dheng kali.
Na ka liang ki nongleit nongwan ruh kiba dei na bar jylla, ki kyntu ïa ka sorkar Meghalaya ba kan sngewbha ban shimkhia lem banweng noh kham kloi ïa kane ka jingeh ba ki iakynduh ha kane ka jingiaid lynti jong ki kaba ki la sahkut da ki bun kynta khlem bam khlem dih.
La iathuh ruh ba ki don ruh ki briew kiba pang ba shitom, don ruh kiba don lang bad ki khun ki kti, ki kynthei ki khynnah kiba mad jingeh ha kane ka jingsahkut kali kaba jur bha ha Sonapur ter ter shaduh Malidor.