Shillong, Naitung, 30: Ka Hynñiewtrep Youth Council(HYC), Riwar Mihngi Circle, ha ka sngi Thohdieng ka la leit ban jurip ïa ka Cumminuity Health Center (CHC) kaba don ha Pynursla hadien ba bun ngut ki nongleit shim dawai bad kiba leit ai jigsumar ha kane ka jaka sumar ki la ai ka jingujor sha ka seng namar ka jingbym ju ïa kynduh doktor bad ka jingbym biang ka rukom ai jingshakri ki nongtrei jong kane ka jaka ai jingsumar.
Ka HYC ha kane ka jingleit jurip kam shym la lap satia ban don kino kino ki doktor kiba don ha kane ka jaka ban ai jingsumar ïa kiba pang ba shitom.
“Ngi poi ha ka por 10 shiteng eiei bad ngim shym la lap ïa kino kino ki doktor kiban ai jingsumar ïa ki nongpang kiba don ha kane ka jaka ai jingsumar” ong u Samla Donaldson Pyngrope President ka HYC haba kren bad u Mawphor.
“Don ruh ki nongpang kiba la poi ha Emergency naduh ka por 8 baje eiei mynstep hynrei kat haduh ka por 10 shiteng eiei kim pat shym la ïoh jingsumar namar ym don doktor satia. Ka jingim jong ki nongpang kiba wan ai ningumar ha kane ka jaka lada ka jia kumne kan buh pynban ha ka jingma. Ka jingim bad ka jingïap ka shong wat tang ha ka shisekhon, lada slem ban ai jingsumar ka lah pynban ban jia ka jingduh ei ka jingim ki nongpang” u la ong.
U Samla Donalson u la kam ruh ba ki doktor kiba dei ban ai jingshakri ïa ki paidbah ha kane ka jaka ai jingsumar ki kham pynlut por pynban ban ai dawai ha ki jaka ai dawai shimet.
“Ngi la lap da ki khmat lajong ïa ka jingbym ai jingshakri kaba paka ïa ki paidbah da kane ka jaka ai jingsumar bad ngi dawa na ki bor ba dei peit ba kin ai jingpynshitom ïa kino kino ki nongtrei kiba khein sting ïa la ka kam” la bynrap u Samla Donaldson
Shuh shuh na ka liang ka HYC ka la dawa ba ha ka Emergency Ward ka sorkar ka dei ban pynthikna ba dei ban don doktor beit baroh 24 kynta.
Haba ïakren bad iwei i long kmie iba la leit ban shah ai jingsumar ha kane ka CHC bad i la ïathuh ba i la poi ha Emergency naduh ka por 8 baje eiei bad ym shym la don uwei ruh u doktor uban wan peit ban sumar ïa u khun jong i.
Shuh ruh haba pyrshang ban ïakren bad ki katto katne kiba wan ap ban shim dawai ki la pynpaw ïa ka jingsngew shah iehnoh beiñ namar ka jingbym biang ki doktor bad ki nongtrei ha kane ka jaka ai jingsumar khamtam eh ïa kito kiba wan ka ïing kaba duna ka ïoh ka kot namar ka jingbym don da kiwei pat ki lad ban leit shah sumar ha ka jaka sumar shimet.
