Williamnagar, Nailur 28: Ka A.chik Organization for Social Welfare (AOSW) ha ka sngi Balang ka la pynrem jur ïa ki ophisar jong ka Samanda C&RD Block namar ka jingpyndonkam bakla ïa ka pisa kaba la mang jong ka skhim MGNREGA bad ka la ong ba na ka liang jong ka seng kan sa ujor ïa kane ka kam bamsap sha ki bor jong ka aiñ.
Kat kum ka RTI ba la ïoh, la lap ba kat kum ka mang jong kane ka skhim u snem 2020-21 la mang ban shna ïa ka suurok ba long ban ïaid kali na Dengagre sha Matchakolgre, ha ka jingjrong ba 400 meters hynrei ha ka jingshisha la shna tang kumba 200katba ka 200 meter la shu pyni tang ha ki kot ki sla bad la lap ruh kat kum ka mang tyngka la lap ba la mamng na bynta ban shna ïa ki nala hynrei katba ha ka jingjurip ka seng ym shym la shna nala satia.
Haba kren bad u Mawphor u Vice-president ka seng u la ong ba kane ka jingbym pyntrei hok ïa kane ka skhim ka dei ka jingbamsap ïa ka pisa u paidbah bad ka jingknieh ruh ïa ka roi ka par kaba ki dei hok ban ïoh.
“Dei hadien ba ngi la ïoh ka jingujor kaba bun na ki nongshong shnong ba ngi la leit jurip da lade ryngkat ki ophisar ha ka 10 tarik Nailar bad ha kane ka sngi ki la kular ban pyndep ïa kane ka bynta ba dang sah hynrei kat haduh mynta ym don eiei ban pyni dak ba kin pyndep kumba la kular bad wat ki ophisar ruh kim ju wan mih satia ban wan peit ba ka ka kam ka dei ban ïaid sha khmat” u la ong.
“Ngim lah shuh ban shu peit ïa kane ban ban ap ba ki ophisar kin leh eiei hadien bun bun sngi ba ngi la ai por bad na ka liang jong ngin ngi leit ruh wat ban ujor ïa kane sha ka iing kashari khnang ban rat dyngkhong ïa kane ka kam bamsap” u la ong.
