Shillong, Nailur 28 (PIB): Kynhun Myntri ka la mynjur ban bteng biang ïa ka Pradhan Mantri Garib Kalyan Anna Yojana (PMGKAY-Bynta VII) lane ka jingsam khaw reshon ei na ka bynta kiba duk sa 3 bnai kata naduh u Risaw haduh Nohprah, 2022.
Ha ka por ba ka pyrthei baroh kawei ka ïakhun na ki jingshah ktah jong ka Covid ha kaba iadei bad ka jingduna ka jingshong syier namar ki daw bapher bapher, ka India ka la lah ban pynthikna ka jingshngaiñ ka bam na ka bynta ki briew kiba duk bad kiba tlot ha ka imlang sahlang da kaba shim ïa ki sienjam ba donkam ban pynbiang ïa ka bam ha ka dor kaba duna na ka bynta ki riewpaidbah.
Haba ïohi ba ki briew ki iaid lyngba ka por kaba eh namar ka khlam, ka sorkar ka la rai ban bteng biang ïa ka PMGKAY sa lai bnai khnang ba ki briew kiba duk bad kiba tlot ha ka imlang sahlang ki ioh ka jingkyrshan na ka bynta ki jinglehkmen ki ban wan kum ka Navratri, Dussehra, Milad-un-nabi, Deepawali, Chhath pooja, Gurunanak dev Jayanti, Christmas, bad kiwei kiwei khnang ba kin lah ban lehkmen da ka jingsngew shngaiñ. Da ka jingthmu ban pynthikna ïa kane, ka sorkar ka la mynjur ïa kane ka jing bteng ïa ka PMGKAY sa lai bnai, khnang ba kin lah ban ïoh ïa ki jingmyntoi jong ka jingdon ki mar bam khlem kano kano ka jingeh ha ka jingkyrduh pisa.
