Shillong, Nailur, 28: U Myntri Rangbah ka Jylla u Conrad K. Sangma ha ka sngi Baar u la ong ba ka Sorkar ka la pynlut palat khatsan persen na ka Mang Tyngka jong ka Jylla sha ka pule puthi manla u snem.
U Myntri Rangbah u la pynpaw ïa kane haba kren ha ka jingrakhe ïa ka Jubili Rupa jong ka Mawsynram Border Area College ha Mawsynram, East Khasi Hills.
U la bynrap ba ka Sorkar, wat hapdeng ki jingshah tynjuh kiba bun ha ka pule ka puthi, hynrei ka la buh hakhmat ïa ka thong ban pynjanai ïa ka pule puthi ha ka jylla baroh kawei.
“Ka Pule Puthi ka don lut ha manla ki jaka, kum ka Sorkar, ngi la phaikhmat khyndiat. Ka dei kawei na ki jingtynhuh kaba kaba khraw bha. Kam long satia kaba suk ïa ka Sorkar ban pyrshang ban weng lut ïa baroh ki jingeh tang ha i por ba lyngkot. Hynrei ngi hap ban shim ïa kane kum ka jingtynjuh bad ban trei na ka bynta ban pynjanai ïa ka pule puthi, la ka long ha kaba ïadei bad ka Education Policy, la ka long ïa ka sorkar ban bei pisa na ka bynta ban shna ïa ki iing skul, la ka long ban plie ïa ki People’s College, la ka long ha kaba ïadei bad ka jingai jingkyrshan ban shna ïa ki ing skul bad kolej,” u la ong.
“Bun bah ka pisa ba la mang bad shibun ki kam ki la tyllun ha kaba pynbha ïa ka pule ka puthi. Ka dei kawei na ki mat bakongsan bad kaba jwat bha. Na ka T.16,000 klur ka pisa ba ladep mang ka Sorkar Meghalaya ka la pynlut manla u snem palat T. 2500 klur ha kaba pynlut sha ki skul bapher bapher, ki kolej, bad nalor kata, ha kaba ïadei bad ki jingshna ïa ki ing skul manla u snem. Na ka liang jong ka Sorkar, ka la buh kum ka bynta bakongsan tam ïa ka tnat Pule Puthi ïa kaba lah ban ïohi lyngba ka mang tyngka ba la pynlut ha ka pule puthi,” la bynrap u Myntri Rangbah.
U Myntri Rangbah u la ong ruh ba ka Sorkar ka la ïatreilang bad ki kynhun bapher bapher ban don ïa kajuh ka jingkitkhlieh ban ïohi ïa ka jingjanai jong ka pule puthi ha ka jylla.
“Ngi don bun ki kynhun ha ka tnat pule puthi. Ngi don ïa ka kynhun ki nonghikai, ka imlang ka sahlang, ngi don ïa ka kynhun ki kmie ki kpa. Manla kawei pa kawei ka kynhun ka don la jong ka thong ban trei na ka bynta ban pynjanai ïa ka pule ka puthi,” u la ong.
U la ong ba ka Sorkar ka la pyrshang ruh ban pynrung ïa ka Higher Education wat sha ki jaka nongkyndong da kaba shna ïa ki jaka pule kiba bha lane da kaba plie ïa ki Higher Educational Institute ha ki jaka nongkyndong khnang ban weng ïa ka jingeh jong ki khynnah pule kiba la nang kharoi na ka sngi sha ka sngi.
“Lada ngi peit ïa ka jingdon jong ki Kolej phin ïohi ba ki bun bha ha nongbah Shillong lane ha Tura bad ha kiwei kiwei ki District Heaquarter. Namarkata, na ka bynta ki samla pule kiba sah ha ki jaka nongkyndong ki duhnong bha ban ïoh jaka pule ha ki jingpule kiba shalor na ka daw ka jingduna ki jaka pule ha ki jaka nongkyndong. Ka Sorkar ka la trei shitom bha ban wanrah ïa ka jingkylla ban pynthikna ba ki khynnah skul jong ngi kin ym duhlad ban bteng ïa ki jingpule kiba shalor,” la ong shuh shuh u Myntri Rangbah.
Ha kane ka sngi, u Myntri Rangbah lem bad u MP ka Rajya Sabha u Dr. W.R. Kharlukhi, u Myntri ka tnat Pule Puthi u Bah Lahkmen Rymbui bad kiwei kiwei ki la plie paidbah ïa u durmot jong u Bah Shrolenson Marbaniang u nongseng ïa ka Mawsynram Border Area College bad ha kajuh ka por la pyllait paidbah ruh ïa ka Souvenir jong ka jingrakhe Jubili Rupa jong ka Kolej.
