Shillong Risaw 07: I mat ha jylla Meghalaya la sdang ban wan poi sa tang ki tiar kiba shu pyrthuh bud ne duplicate ha kaba bun na ki paidbah kim ju poi pyrkhat ban peit ne khmihbniah ïa ki tiar kiba la wan poi ne kiba la shalan na shabar, khamtam kum ki marbam mardih.
Ïa kane ka jinglah ban suba jur halor ka jingwan poi jong ki tiar kiba la shu pynbud ne duplicate la lap ha kawei na ki jait umsoh ha ki bilor plastic ha kaba bun na ki nongshong shnong ka Jylla ki sngewbha eh ban thied.
Kane ka umsoh ka dei kaba la ai kyrteng da ka Maaza Mango Grand Pujo, kumba long kiwei pat ki jait umsoh ki shait don ïa ki tarik ba dang long ban pyndonkam ba la thoh hajan jong ki jingtap bilor, hynrei kane ka umsoh duplicate kam don satia ïa ka expiry date.
Ha ka brand ne jingsop jong kane ka umsoh la pynbeij da ki jinglah ban jop ïa ki khusnam kaba la kut noh ha ka 3 tarik mynta u bnai.
Ha ka jingsop jong u bitor la thoh ruh ïa ka kyrteng Maaza Grand Pujo Parikrama bad ka umsoh kaba don ha une u bilor ka long 600 ml bad la thoh ba la shna ïa kane ka umsoh da ka Moon Beverages Limited A-32, SITE-IV Industrial area Sahibabad, Ghaziabad Uttar Pradesh.
Lah ban ong ba na ka liang ki katto katne ki briew ki bym kwah ban pynpaw kyrteng haba ïakren bad u nongthoh khubor ki la ong ba ki la dep ban thied ïa bun tylli ki bilor bad don ruh kiba la dep dih hynrei dei tat haduh ba la don ba ïohi bad poi pyrkhat ban peit ïa ka tarik ba kut por ne expiry date ba la shem ba bun na kine ki bilor ki khlem thoh ne print ïa ki expiry date.
Lehse halor kane ka jingjia lah ruh ban buh jingkylli ïa ka sorkar jylla ba hato ka ju don ne em ka jingkhmih bniah ïa ka jingpynpoi jong ki marbam mardih sha kane ka jylla ba la shalan da ki kompeni bapher bapher bad ka jingdon ki kynhun shim kabu ban pynrung ïa ki tiar thok ne duplicate sha kane ka jylla.
