Shillong, K’Lyngkot 16 : Ka East Khasi Hills ka la ioh ban lam khmat ha ka jingkhur ia ki takma ha ka lympung ialehkai jong ka Meghalaya Games 2024. Haduh ka sngi ba ar, ka East Khasi Hills ka la ioh ban khur haduh 17 tylli ki takma ksiar, 11 tylli ki takma rupa bad 14 tylli ki takma rnong kaba long baroh 42 tylli na ki 94 tylli ki takma baroh ha kane ka sngi.
Ki takma ba ka distrik ka khur kham bun ha kane ka sngi ki dei na ka jingiakob jngi kaba kum ka kynhun ka dang don ka thong ban dang khur kham bun wat ha kane ka sngi Balang.
Ia ka kyrdan kaba ar ha jingkhur bun tylli ki takma la ioh da ka West Garo Hills da ki hynriew tylli ki takma ba kynthup ia ki saw tylli ki takma ksiar bad ar tylli ki takma rupa. Ia ka kyrdan kaba lai pat la bud sa kaSouth West Khasi Hills kaba la ioh ban khur lai tylli ki takma ksiar, hynriew tylli ki takma rupa bad hynriew tylli ki takma rnong kiba long baroh 15 tylli.
Ka distrik kaba bud dei ka West Jaintia Hills da ki 9 tylli ki takma ba kynthup ia ki lai tylli ki takma ksiar, lai tylli ki takma rupa bad lai tylli ki takma rnong. Katba ka Ri Bhoi pat ka bud da ki lai tylli ki takma ksiar, ar tylli ki rupa bad san tylli ki takma rnong kiba long baroh 10 tylli.
