Shillong, K’Lyngkot 16 : Ka jingïakob mareh kaba hap ha ka thup Athletics ka la pynshongshit haduh katta katta ïa ki nongwan peitkai ha ka Meghalaya Games kaba long ha kane ka sngi Ba-ar. Ha kane ka sngi la sakhi ruh ba ka Jylla ka don ïa ki arngut ki nongïalehkai ba kynsai, kata u Renaldi Dkhar na West Jaintia Hills bad ka Angelina Jackson kiba la ïoh ban thaw ruh ïa ka rekod kum ki nongmareh kiba stet tam ha ka ïakob mareh 100 metre.
Ha kane ka jingakhun, na ka liang u Renaldi u la lah ban pyndep ïa ka thong ha ki 11.4sekhon katba u Gracewin u la lah ban pyndep ha ki 11.6sekhon bad u Pilo Ronghang u la wan ba-lai ban pyndep ïa thong ha ka 11.7sekhon
Katba na ka liang ka Angelina Jackson ka la lah ba kan rah ïa ka nam jop hadien ba ka la pyndep ïa ka thong ha ka 13.6sekhon, ba wan ba-ar dei ka Savinity Jyndiang kaba la pyndep ïa ka thong ha ka 14.2sekhon kaba jan ïa ryngkat lang bad ka Ibaïahun Kurbah kaba la lah lem ban pyndep ha ka juh ka por.
Ha kane ka sngi kaba sdang kumba 6 tylli ki jait jingïalehkai la lah ha kaban pynlong ha ka sngi kaba sdang bad ïa kane ka kynthup ïa ka ïakob mareh jong ka 1500m ha kaba u Skehmlang Suba u la khur ïa ka takma ksiar hadien ba u la pyndep ïa ka thong ha ka 4:04:7, bud pat a u Dabit Dkhar uba la wan ba-ar hadien ba u la pyndep ïaka thong ha ka 4:08:9, katba ka takma rnong ka leit sha u Banjoplang Wanniang hadien ba u la pyndep ïa ka thong ha ka 4:09:0.
Haba phai pat sha ka liang ki kynthei ha kane ka juh ka kyrdan ïakhun, ka nam jop ka leit sha ka Glorify Kurbah na Shillong kaba la pyndep ïa ka thong ha ka 5:04:1s, katba ka takma rupa bad rnong la khur ïa ki da ka Daphlin Wahlang bad ka Balasiewdor Pathaw (SWKHD) kiba la pyndep ïa ka thong ha ka 5:13:5s bad 5:20:3s
Ha ka High Jump jong ki shynrang ka takma ksiar la khur da u Primus Ronghi ka Ri-Bhoi hadien ba u la lah ban kynthih haduh 1.90m katba ka takma rupa bad rnong ka leit sha u Pringchang N Sangma ka Williamnagar bad Simeon Marak ka North Garo Hills.
Katba na ka liang jong ki kynthei ki nongïalehkai ka Ri-Bhoi ki la pawbha shakhmat tad haduh ba kin da ïoh ban khur ïa ka takma ksiar bad rupa kaba ha kane ka kynti ba mynta la khur ïa ki da ka Rinalgi Ingti (1.55 m) bad Andrisha Klien (1.45m), ka takma rnong ka leit sha ka Roshni Ch Marak (Williamnagar)
Kumta ha kaba kut jong ka sngi kaba nyngkong ka kynhun ïalehkai jong ka Ri-Bhoi ki la ïoh ban khur haduh 3 tylli ki takma ksiar bad mar kawei ka takma rupa bad rnong, bud pat sa ka kynhun ïalehkai ka Shillong kiba la khur 2 tylli ki takma ksiar bad sa kawei ka takma ksiar la khur da ka West Jaintia Hills.
Lada ïa phai pat sha ka jingïalehkai ïalympat (Wrestling) ha ka Women Freestyle Wrestling kiba khia 45kilo, ka Ribhalang Sun na East Khasi Hills ka la khur ïa ka takma ksiar, katba ïa ka takma rupa ka khur da ka Rikyntiew Nongrum kaba na East Khasi Hills.
Ha ka Freestyle Wrestling jong ka jingkhia kaba 48kilo, ka Scolastica Rymbai kaba na na East Khasi Hills ka la khur ïa ka takma ksiar, katba ïa ka takma rupa la khur da ka Ibakordor Jyrwa na East Khasi Hills.
Katba ka jingïalehkai jong ka badminton ka la lah ba kan pyndep ïa baroh ki jingïalehkai ba dei jong ka semifinal ha kaba Nitania Tariang (EKH) ka la jop ïa ka Sengte WD Shira (WGH)da 21-12, 21-8, ka Shimtihun Lyngdoh (WKH) ka la lah ba kan pynliem ïa ka Nihaka Lamare (WJH) da 21-12, 21-15.
Ha ka jingïakhun jong ki shynrang u Raynel Kharbuki u la lah ban pynliem noh ïa Raymond Ronghang (RBD) da 21-10, 21-15, U Stephan marwein (EKH) u la jop ïa u Mewanlamkupar da 18-21, 21-19,21-14.
Ha ka jingïalehkai ba shi jur ki kynthei ka Shimtihun Lyngdoh bad ka D Kharbani (WKH) ki la lah ban pynliem noh ïa N.A Sangma bad SWD Shira (WGH) da 21-12, 21-10. Katba ka Nitania Tariang bad Carlynda Nongbri (EKH) ki la lah ban pynliem noh ïa D Lyngdoh bad D. Ryngkhlem (WJH) da 21-8, 21-18.
Haba phai pat sha ka jingïakhun ki shynrang u B Lamare bad L Suchiang ki la jop ïa u Gaurav Dutta bad u Biswajit Ghosh 21-19, 21-17, katba u Raynel Kharbuki bad P Mazumdar (EKH) ki la pynliem noh ïa u Babrian bad Raymond (Ri-Bhoi) 21-8, 21-11.
