Shillong, K’Lyngkot 16 : Ha ki kato katne ki jingialehkai ha kane ka lympung la don ruh ki samla ba la wan ban ïashim bynta, kiba la dei teng kita ki khlur ïalehkai kiba kynsai bad ba la mihkhmat ruh ïa ka ri, kum ka nuksa ka Wandahun-shisha Mawblei ha ka liang ka Karate, nangta u Kyrshanbor R. Songthiang ba ïalehkai ïa ka Wushu ha ka event kaba dei jong ka taulo.
U Kyrshanbor u la dei teng ruh u samla ïalehkai ba la khur takma na bynta ka jylla ha ka 2nd North East Olympic Games bad nalor katta dang don shuh sa kiwei kiwei ki rang bad ki thei samla kiba la poi lem ha ka ban aireng sha kane ka lympung ïakhun.
Kaba la kham pynitynnad bad pynshoh biej napdeng baroh ki jingïalehkai kiba la long ne sdang mynta ka sngi dei ka Gymanstic hapoh ka jingpynïaid ka Gymnastic Association of Meghalaya.
Hangne ki khynnah kynthei kiba dangrit, ki la mih madan khlem jinglehraiñ ban pynpaw pat ïa ka sap kaba nylla ka jong ki kum ha ka floor exercise bad ha ka vault, ha kaba ka jingsam ïa ki takma sha ki khynnah rit kan long lashai pat ka sngi.
Ha ka liang jong ka phutbol jong ki kynthei, ka shi kol ba la ïoh ban thep ïa ka da ka Dimika Khongkai, ka la biang pura ïa ka kynhun ïalehkai ka Ri-Bhoi District ba kin lah ha kaban pynliem noh ïa ka East Jaintia Hills District, katba ïa ki kol la thep da ka Philasakhi Marngar bad Blessiful Thongni ka la pynlong ïa ki thei ïalehkai jong ka West Khasi Hills ban jop da 2-0 ïa ka West Garo Hills
Kumta kaba sah jong kane ka jingïakhun ka long ba kan khreh ba kan jam noh sha ka semifinal, ha kaba ka Eastern West Khasi Hills kan ïakhun pyrshah ïa ka Ri-Bhoi District, katba ka South West Khasi Hills kan ïakhun pyrshah ïa ka East Khasi Hills bad kine ki jingïakhun la buh ban long ha ka 18 tarik mynta u bnai. Kine ki jingïakhun kin long ha ka por 12:30 bad 2:30 nohphai sngi jong 18 tarik mynta u bnai.
Haba phai pat sha ka jingïalehkai jong ki shynrang ka jingïakhun ka la jam lem sha ka semifinal ha kaba ka East Khasi Hills kan ïakhun pyrshah ïa ka Ri-Bhoi Distrcit bud pat sa da ka jingïakhun hapdeng ka West Jaintia pyrshah ïa ka West Garo Hills District ka ban long ha ka 18 tarik mynta u bnai ha ka por 5 bad 7 baje janmiet.
Ha ka jingïakhun kiba la long mynta pat ka sngi, ka West Jaintia Hills ka la lah ba kan pynliem noh da 2-0 ïa ka East Garo Hills bad ïa kine ki artylli ki kol la thep ïa ki da Nickybor Swer bad Tiros Kyndait.
Katba ka kynhun ïalehkai jong ka East Khasi Hills ka la lah ba kan pynliem da 6-0 ïa ka South West Garo Hills District ha kaba u nam tam ha kane ka jingïakhun dei u Freddy Jyrwa uba la ïoh ban thep haduh lai kol (hat-trick) bad ïa ki kol kiba sah la thep ïa ki da u Dawyo Shadap, Rodrygo Shadap bad u Ricky Mawlong.
Katba ha ka liang jong ka jingïalehkai ïa ka Taekwando, ka la don ruh ka kyran ïakhun ha kaba ki samla ba ïalehkai ki la ïoh ban khur ïa ki takma ki jong ki. Ki nongïalehkai kiba la ïoh ban khur ïa ki takma ki jong ki ka dei ha ka kyrdan ïakhun jong ka mixed cadet mixed pair jong ka poomsae.
Ïa ki takma ksiar jong kane ka jingïakob hapdeng ki shynrang bad kynthei la ïoh ban khur da Veronica Severa S Sangma bad u Marc Zodinlia na West Garo Hills. Ka tama rupa ka leit sha u Hamebansuk Power Suchiang bad Susandala Rabon West Jaintia Hills, katba ki nongialehkai kiba la ïoh ban khur ia ki takma rnong ki Long Jaymit Mukherjee bad ka Pearlina Sen.
