Shillong, K’Lyngkot 16 : Ha ka jingïakhun kaba da ihun jrut, ki nongjngi ka East Khasi Hills, Shillong ki la ïoh ban khur jan baroh ki takma ksiar na ki 10 tylli ki takma rupa ha ka sngi ba nyngkong jong ka lympung ïakhun jngi jong ka Meghalaya Games 2024 kaba long ha Rongkhon Swimming Centre.
Na ki 25 tylli ki takma kiba ka jop ha katei ka sngi nyngkong, ki thei bad ki rang jngi ka East Khasi Hills ki la ïoh ban khur 9 tylli ki takma ksiar, 6 tylli ki rupa bad 10 tylli ki takma rnong.
Ïa ka kyrdan kaba ar pat ha katei ka jingïakhun la ïoh da ka South West Khasi Hills kaba khur saw tylli ki takma, kynthup kawei ka ksiar bad lai tylli ki rupa.
Haba phai pat sha ka jingïalehkai Taekwondo (Poomsae), ka West Garo Hills ka la ïoh ban lamkhmat da kaba khur 2 tylli ki takma ksiar, kawei ka takma rupa bad kawei ka rnong na ki lai tylli ki thup ïalehkai.
Ïa kawei pat ka takma ksiar la ïoh da ka West Jaintia Hills kaba la khur ruh kawei ka takma rupa bad kawei ka rnong. Ka Ri Bhoi ruh ka la ïoh ban bud lang da kaba khur kawei ka takma rupa, ar tylli ki takma rnong katba ka East Khasi Hills ka ïoh lai tylli ki takma rnong.
