Mawkyrwat, Nohprah 03: Ka Youngest Boy Football Club ka la long ka nongjop pyrshah ïa ka Sakwang Sports Club ha ka lympung ïalehkai kynjatbol kaba la tip kum ka 1st Maitshaphrang Under-16 Football Tournament 2023 ba la pynïaid da ka Khasi Students Union (KSU), Mawkyrwat Circle ha Madan MDSA, Nonglang, South West Khasi Hills District.
Ha ka jingïalehkai jong kitei ki ar kynhun kiba la poi ha kaba wat ba khadduh jong kane ka lympung ka la long ka jingïalehkai kaba la i tynnad shisha ha kaba ka Youngest Boys FC ka la long ka lah ban thep da 1 – 0 kol pyshah ïa ka Sakwang Sports Club. Ïa kane ka kol jong ka Youngest Boys FC la ïoh ban thep kol lyngba u Donal K. Kharai ha ka 22 minutes.
Hadien ka jingïalehkai ka Youngest Boys FC ka la ïoh khur ïa ka song pisa kaba T. 29 hajar tyngka ryngkat bad ka khusnam bad ka Sakwang SC ka la ïoh rah T. 18 hajar tyngka ryngkat bad ka khusnam.
U kongsan uba la wan ban ban pynhap pyrda ïa kane ka 1st Maitshaphrang Under-16 Football Tournament 2023 u dei u bah Lambokstar Marngar, President KSU Central Body kum u kongsan bad u bah Kitborlang Nongrem kum u symbud kongsan.
Ha kane ka sngi la ïoh ka jingkren ai mynsiem ïa ki samla ïalehkai da u Lambokstar Marngar, bah Kitborlang Nongrem bad kumjuh na u bah Forwardman Nongrem, President ka KSU South West Khasi Hills ha ryngkat ka jingïadonlang ki dkhot ka KSU Mawkyrwat Circle bad ki paidbah kiba la wan ban ai jingkyrshan ïa ki samla ïalehkai jong baroh ar tylli ki kynhun.
