Shillong, Nohprah 03: Ka kynhun lehkai jong ka Mawtawar SC ka la ïoh ban khur namjop ha ka jingïakhun kaba la long hynnin ka sngi Saitjaiñ jong ka lympung SSA 2nd DIVISION Football League 2023, katba ka jingïakhun hapdeng ka Laitlyngkot SC pyrshah ïa ka Nongkrem SC ka la kut ha ka jingïakhaid.
Haba phai sha kine ki jingïakhun ba la pynlong ha SSA Ground, ka jigngïalehkai kaba nyngkong la sdang ha ka por 11:30 baje mynstep hapdeng ka Sohiong SC bad ka Mawtawar SC, ha kaba ka Mawtawar SC ka la khur ïa ka namjop kaba suk da 4 kol.
Ka Mawtawar SC ka la ïoh ban thep nyngkong lyngba u Larrycarson Lyngdoh ha ka 25 minit bud sa na u Fedrick Lyngdoh ha ka 29 minit kaba la pynlong ïa ka kynhun ban lamkhmat lypa da ar kol ha ka kylla kaba nyngkong.
Ka jingïakhun ha ka kylla miet ka long kaba jar jar dei tad ynda la jam sha ka 71 minit ba u Teibhalang Kharpuri u la ïoh ban thep ïa ka kol kaba lai na bynta ka Mawtawar SC shuwa ba u Ronaldo Rangslang un thep ïa ka kol kaba khadduh ha ka 82 minit.
Haba phai pat sha ka jingïakhun kaba ar kaba la sdang ha ka por 2:30 baje nohphaisngi hapdeng ka Laitlyngkot SC pyrshah ïa ka Nongkrem SC, haduh kaba kut jong ka por ym shym la don ba lah ban pynkhihjar bad ïakhaid da 0 kol.
La pyntip ba ka jingïakhun mynta ka sngi yn pynlong biang ha SSA Ground, bad ka jingïalehkai kaba nyngkong kan sdang ha ka por 11:30 baje mynstep hapdeng ka Pohkseh SCpyrshah ïa ka Imson SC nangta bud sa ka jingïakhun kaba ar ha ka por 2:30 baje nohphaisngi hapdeng ka Lumshyiap SC pyrshah ïa ka Smit SC.
