Shillong, Jymmang 02 : Ka kynhun ïalehkai jong ka West Jaiñtia Hills District ka la ïoh rah ïa ka nam lahduh jong ka lympung Chief Minister State Level Inter School Athletic Meet 2023 kaba la pynlong da ka tnad Directorate Sports and Youth Affairs jong ka Sorkar Jylla ha ka sngi Thohdieng kaba dei ka sngi kut ha SAI, NEHU.
Katba ka kynhun kaba wan ha ka kyrdan ba ar kadei ka Ri- Bhoi District kaba ïoh ban khur 16 tylli ki takma ba kynthup 8 tylli ki takma Ksiar, 2 ki takma Rupa bad 6 tylli ki takma Rnong.
Ka West Jaiñtia Hills District ka la ïoh rah ïa ka nam lahduh hadien ba ka la ïoh ban khur haduh 23 tylli ki takma ha kine ki lai sngi jong katei ka lympung, kaba kynthup 14 tylli ki takma Ksiar, 6 tylli ki takma Rupa bad 3 tylli ki takma Rnong.
Shuh shuh ka WJHD ka la pynthikna ban rah ïa ka nam lahduh kadei hadien ba ka kynhun ïalehkai U-16 ki khynnah shynrang ka la ïoh rah ïa ka nam lahduh da kaba khur haduh 15 tylli ki takma ba kynthup 9 tylli ki takma Ksiar, 5 ki takma Rupa bad kawei ka takma Rnong.
Ha ka liang ki kynthei, ka kynhun ïalehkai jong ka West Jaiñtia Hills District ka la ïoh ban khur ïa ka jingjop kaba nyngkong hadien ba ka la ïoh ban khur 16 tylli ki takma ba kynthup 7 tylli ki takam Ksiar, 2 ki takma Rupa bad 7 tylli ki takma Rnong, katba kaba wan ba ar kadei ka West Jaiñtia Hills kaba la ïoh ban khur 8 tylli ki takma, kynthup 5 tylli ki takma Ksiar, 2 ki takma Rupa bad kawei ka takma Rnong.
Ïa kane ka lympung la wan ban pynhap pyrda noh da ka Kong Matsiewdor War Nongbri, IAS kum ka Kongsan ha ka jingdonlang u Bah John F Kharshiing Working President ka Meghalaya State Olympic Association (MSOA) kum u symbud kongsan, ki ophisar ka tnad sport, ki DSO bad ki khynnah skul.
