Mawkyrwat, Jylliew 02: Ka Federation of Khasi Jaiñtia & Garo Peoples (FKJGP) jong ka Sawsymper Circle mynta ka sngi kum ka dak jong ka jingaimynsiem na ka bynta kawei na ki khynnah skul kaba la poi sha ka thong kaba kham hakhmat eh ka la ïoh pynkup burom ryngkat ka jingaisngewbha da ka Laptop.
Lah ban kdew ba ka khynnah skul kaba la poi sha ka Top-20 ha kane ka jingpynmih ïa ka result jong ka klas X ne SSLC (MBOSE) ka dei ka Jessica Marweiñ kaba la ïoh khur ïa ki jingkheiñ mark haduh 544 bad ïoh distinction ïa ka English, Math, Science & Technploy, Social Studies, Health Education, Khasi bad ka pule hapoh ka St. Ferrendo Secondary School, Sawsymper, East Khasi Hills District.
Kum ka jingpyn kynmaw ba ka jingpynkup jong ka FKJGP Sawsymper Circle ïa katei ka khynnah pule ka dei hadien ba ka kum ka seng ka la buh lypa ïa ka thong la bun tylli ki snem ba ïa ki khynnah kiba ïoh bad poi ha ka Top-20 ha ka Exam MBOSE kin sa ai sngewbha da ka Laptop.
Haba ai jingkren lyngkot na ka samla Jessica Marweiñ nyngkong eh ka la pynpaw ka jingnguh ïa U Blei Uba la lam lynti ha ki por baroh ha ka jingim jong ka namar khlem ma U kan nym lah ban leh ei ei ruh em. Ha kajuh ka por ka la pynpaw ruh ka jingkhublei na ka bynta ki kmie ki kpa ba dei lyngba ka jingaimynsiem jong ki ruh ba ka sa poi haduh kane ka thong, namar ki kmie ki kpa ki ju ai ki jingsneng jingkraw ha manla ka sngi bad kyrpang ruh na ka bynta ki nonghikai kiba la pynlut ka por ka bor ha ki kynta jong ka jinghikai hapoh skul bad kiba la ai ruh ki jingtip bad kdew lynti kumno ban pule ïa ki kot ki sla.
Namarkata, lyngba ka jingpoi jong ka sha kane ka thong, ka samla Jessica Marweiñ ka la ai mynsiem ïa ki para khynnah ba haba ki don ha ki jingpule ki dei ban pynlut ka por khambun ha kane ka bynta ym ha kiei kiei ki bym myntoi namar ka jingpule hi ka dei kawei ka bynta ban poi sha kliar jong u lum ba phyrnai jong ka jingim. “Kum ki khynnah skul haba ki don ka jingpule ki dei ban don ka thong, ka jingkut jingmut, ka jingtrei shitom bad ka jinglen-lade”, ong ka samla Jessica Marweiñ.
Ha kajuh ka por ka la pynpaw ruh ka jingkhublei na ka bynta ka FKJGP jong ka Sawsymper Circle kaba la ai sngewbha ïa ka da ka Laptop bad ka la long da shisha ka jingkyrkhu namar da ka ka lah ban pyndonkam ha kiba bun ki bynta kiba ïa dei bad ka pule puthi ha ki sngi ki ban sa wan. Ha kajuh ka por ka la ai khublei bad kyrkhu kyrdon ïa ka seng ba kan nangïaid shaphrang ban ai ka jingshakri ïa ki para briew bad ïa ka ri bad ka jaidbynriew baroh kawei.
Ki nongkren kiba la ai mynsiem ha kane ka sngi na ka Jessica Marweiñ ba kane nang kiew ha ki kyrdan kiba kham ha jrong ha ki sngi ki ban sa wan bad ba kan leh khambha shuh shuh ban ïa kaba mynta ki long u bah Kitborlang L. Marshillong, Education Secretary ka FKJGP, u bah Running Kharbani, President bad ruh na kiwei de ki dkhot jong ka seng bad ruh ka jingkren na u Fr. Sachaius Syngkli.
