Nongstoiñ, Jylliew 2: U bnai Jymmang u la dep kut hynrei ki nongïalam jong ki Regional Committee on Border Dispute, kim shym pat la wan mihkhmat sha ki shnong na ka bynta ban sngap ïa ka sur ki paitbah bad ban pan jingshai na ki la ki kwah ban leit sha Assam ne kin sah ha Meghalaya.
U bah Hindro Samakha Chairman jong ka Raidmynsaw haba ïakren bad u nongthoh khubor, u la ong ba jingpynsahteng jong ki nongïalam jong ki Regional Committee ban wan sha ki shnong khappud, ka la pynartatien shibun ïa ki paitbah namar ha ki bnai ba la dep, ka sorkar MDA II ka la pynbna paitbah ha ki lad pathai khubor ba ha u bnai Jymmang, kan phah ïa ki nongïalam jong ka Regional Committee, kaba la khlieh da u bah Paul Lyngdoh MLA kum u Chairman ryngkat ki dkhot ba ka sorkar ka la thung, ba kin leit sha ki shnong khappud ban ïakynduh ïa ki paitbah, ban sngap ïa ka sur jong ki bad ban wanrah ïa ka kaiphod sha ka sorkar, hynrei haduh mynta ym shym pat la don mano mano ba wan mih.
Nalor kata u la ong ruh ba ki paitbah nongshong shnong ha khappud naduh ki Khasi bad ki Garo ki la pisa bad lynga jingmut haduh katta katta, nalor ba ha une u bnai ka don sa ka jingshah thngan jong u bah Ardent ka la nang pynklumar jingmut shuh shuh ïa ki paitbah Garo.
U bah Samakha u la ong ruh ba lada ki nongïalam jong ka Regional Committee ki pynsahteng ïa katei ka kam, kan shem jingeh bha namar ha u snem ban wan ka Election MLA ha Assam kan long bad kan nang shim por shuh shuh. Lada jia ba ha Assam ka sorkar kan kylla bad ka BJP kan ym ïoh shuh ban synshar, ka la shem jingeh haduh katta katta ba lada wan da kawei pat ka sorkar.
Kumba ka long ha ki snem ba la leit noh baroh haba ha Assam la ïalam ïa ka sorkar da ka Congress ha Meghalaya ruh la ïalam da ka Congress, hynrei kim shym la shimkhia ne ïakren ei ei ha kaba ïadei bad ka jingpynbeit ïa u pud u sam lait noh ha ka por ba ha Meghalaya la ïalam ïa ka sorkar da ka United Democratic Party bad u (L) Bah E.K.Mawlong u long u Myntri rangbah bad ha Assam ïa ka sorkar la ïalam da ka Asom Gana Parishad bad u Myntri rangbah u dei u Prafulla Mahnata, ba ka jingïakren ban pynbeit ïa u pud u sam ka la sdang, hynrei sniew bok ba u bah E.K.Mawlong u la khlad noh ha ka por ba ka jingïkren ban pynbeit ïa u pud u sam kam pat kut.
U la ong ruh ba katkum ka jingkynmaw jong u ha katei ka por ka sorkar Meghalaya bad Assam ki la sdang ban ïakren ïa ka jingpynbeit ïa u pud u sam da kaba pynshong nongrim na ka Chandrachud Committee. Kaba lyngngoh ka long ba hadien ba u Hiteswar Saikia u la shimti kum u Myntri Rangbah, um shym la patiaw ne buddien biang ïa ka mat ban ïakren pynbeit ïa u pud u sam.
Nalor kata u la ong ba ka jingklumar ha ki thaiñ Langpih ka la jur palat dei ha ka por ba u Tarun Gogoi na ka Congress u bat kum u Myntri Rangbah ka Assam bad u Dr .Mukul Sangma u bat kum u Myntri Rangbah ka Meghalaya. U la pynkynmaw ruh ba ka jingshah siat ïap jong ki saw ngut ki rangbah Khasi ha Langpih ha ka 14 tarik Jymmang 2010, ka dei ha ka por ba kitei arngut ki Myntri Rangbah ki bat kum ki Myntri Rangbah.
Imat lada kane ka sorkar MDA II lyngba u Conrad Kongal Sangma Myntri rangbah ka Meghalaya um lah ban pynkohnguh ïa u Himata Biswa Sarma Myntri rangbah ka Assam ban pynbeit noh ïa u pud u sam hapoh une u snem, yn ym lah shuh ban pynbeit lano lano ruh bad baroh ki jaka ba la kyntur bad knieh da ka Assam, kin sah beit kumto kumba ka long mynta bad ka jingjynjar ka dei ïa ki paitbah Khasi namar ki bun ki nongshet kylla bad kiba bam ar maloi.
