Shillong, Jylliew 02 : Ka Mawlai bad ka Khliehmawlieh baroh ki la pynkut ka jingïaid lynti jong ki ha la ki jong ki group bad ïoh rung sha ka semifinal jong ka lympung kynjat bol Meghalaya State League 2023 lyngba ki jingkhur jingjop.
Ka Khliehmawlieh ka la pynliem ïa ka Warima Youth Club kaba don sha trai duh na ka miej kheiñ point jong ka Group D da 3-1 kol ha ka jingïalehkai ha madan Chandmari Ground ha ka sngi Thohdieng ha Tura katba ha Shillong, ka Mawlai ka la ïoh ban pynliem kput da 12-0 pyrshah ïa ka Seng Samla Laitryngew ha ka jingïalehkai ha madan Third Ground jong ka MFA na ka Group A. U Donlad Diengdoh marwei u ïoh ban thep haduh san kol.
Ha Jowai, ka Niaw Wasa United ka la ïakhaid noh da 3-3 kol bad ka Sein Pynbhalang na ka Group B ha ka jingïalehkai ha madan Kiang Nangbah Stadium. Ha kane ka sngi ka la don ruh ka jingpynlyngngoh ha ka jingïalehkai na ka Group C, ha kaba ka Pyndengrei ka la pynkut ïa ka jingïaid lynti jong ka ha ka MSL 2023 da kaba khur point nyngkong eh hadien ba ka la pynliem da 2-1 pyrshah ïa ka Riangdo.
Watla da ka jingjop baroh sawsien ha ki jingïalehkai kiba dang shu dep bad bat kyrdan ba nyngkong na ka Group A, ka Mawlai kam shym la kheiñ sting hynrei ka la ïai ïakhun tyngeh ha kaba u Donlad Diengdoh u la ïoh ban thep san kol ha ka minit ïalehkai ba 15, 28, 49, 58 bad ha ka minit ïalehkai ba 77.
Kiwei pat kiba la ïoh thep kol ki kynthup u Dajiedlang Wanshnong u la ïoh thep lai kol ha ka minit ba 18, 31, bad 39, u Khongriah u ïoh thep ar kol ha ka minit ba 11, 62′) bad u Kenstar Kharshong ar kol ha ka minit ïalehkai ba 13 bad 79.
Lait noh na ka Shillong Lajong kaba dei ka lahduh kaba dang sah ruh sa arsien ïalehkai, ym don kiwei pat ki team nalor ka Mawlai kaba jop ha baroh ki jingïalehkai mynta ka samoi ïalehkai MSL 2023 bad ka buh thong ban bteng ban ïalehkai bha ha ki jingïakhun kiba dang sah.
Ha Tura, ka Warima ka la ïoh ban thep ïa ka kol kaba nyngkong ha ka minit ïalehkai ba 11 lyngba u Akim R Sangma, hynrei ka Khliehmawlieh ka la ïakhun tyngeh beit triang haduh ba ka la ïoh ban pynphai kol lyngba u Shelbikstar Kharshilot uba ïoh thep ar kol ha ka minit ïalehkai ba 34 bad 52 bad u Lenny Kravity Lyngdoh u thep shi kol ha ka minit ïalehkai ba 73.
Ha Mawkyrwat, ka Pyndengrei ruh ka la ïoh ban wanphai da kaba khur jingjop bad kaba kham kyrpang na kane ka jingïalehkai ka long ba ka ïoh ban khur ïa ka nam jop kaba nyngkong eh jong ka MSL 2023 hadien ba ka la mad nam rem sawsien. U Silverstar Thongni u la thep ïa ka kol lamkhmat na ka bynta ka Riangdo ha ka minit ïalehkai ba 22 bad ka kynhun ka la ïoh ban lamkhmat tad haduh ba u Alandonal Sohlangpiaw u la ïoh ban thep ïa ki ar kol ha ka minit ïalehkai ba 54 bad 62.
Khatduh ha kane ka sngi ka jingïalehkai kaba la long ha Jowai, ka Sein Pynbhalang ka la ïoh ban ïalehkai bha ha kane ka jingïakhun kaba khatduh. U Paiabanteiskhem Bhoi u ïoh ban thep ïa ka shi kol ha ka minit ba 14 hynrei ka Niaw Wasa ka la ïoh ban thep ïa ka kol pynïakhaid ha ka minit ba 26 lyngba u Enrigue Malvin Marshra. Ka Niaw Wasa kaba dei ka lahduh barim, ka khlem lah ban pynneh ïa ka jingïalehkai ha kaba u Sambiang Wara Wet ha ka minit ba 28 u la thep ïa ka kol kaba la wan lyngba ka jingshut corner ha kaba ka Sein Pynbhalang ka la ïoh biang ban lamkhmat da 2-1 kol.
Ka free-kick kaba itynnad jong u Civility Khongmalai ha ka minit ïalehkai ba 41 ka la ïoh ban pynïakhaid biang da 2-2 kol. Ka Niaw Wasa ka la ïoh ban lamkhmat biang ha ka minit ïalehkai ba 52 lyngba ka kol ba la thep da u Buromlangki Salahe hynrei ka Sein Pynbhalang ka la ïoh ban pynïakhaid lyngba ka penalty ba la thep da u Paiabanteiskhem Bhoi ha ka minit ïalehkai ba 88, ha kaba ka jingïalehkai ka la kut noh da 3-3 kol.
Ki jingïakhun ha ka sngi Saitjaiñ, na ka Group A ha Shillong, ka Jyntru pyrshah ïa ka Langsning ha ka por 3 baje janmiet, na ka Group B, Jowai ka Youth Club Pdengkarong pyrshah ïa ka Rangdajied United ha ka por 2:30 baje, na ka Group C, Mawkyrwat ka Seven United pyrshah ïa ka Shillong Lajong ha ka por 3 baje bad na ka Group D, Tura ka Chipakkore kan ïakhun pyrshah ïa ka Wasa FC ha ka por 3 baje janmiet.
