Lahduh ka Red House ha ka ASSM 2023 jong ka Seven Sister Secondary School, Mawmitbah

0

Mawkyrwat, Ïaïong, 13: Ka Seven Sister Secondary School, Mawmitbah mynta ka sngi ka la ïoh ban pynhap pyrda noh ïa ka Annual School Sports Meet (ASSM) 2023 ha kaba ka Red House ka la long ka lah naduh napdeng ki 4 tylli ki house ba la pynlong ïa kane ka jingïalehkai ha madan jong ka Mawsaw Sports & Cultural Club, South West Khasi Hills District.
Ïa kane ka Annual School Sports Meet (ASSM) 2023 la wan ban pynhap pyrda noh da u bah Edilbert Iawphniaw kum u kongsan ha ryngkat ka jingïadonlang u bah Staising Khartbteng, Sub-Inspector of School hapoh ka ophis jong ka Sub Divisional of School Education Officer (SDSEO) uba dei u symbud kongsan bad uba la shim ïa ka salute na ka bynta ka March Pass jong ki khynnah skul ha ryngkat ka jingsynran lang da ka Headmistress, ka kong Mancyfull Lyngdoh.
U bah Edilbert Iaw-phniaw haba kren ha ka jingïalang, u la pynpaw ka jingkhublei na ka bynta ki nongpynïaid skul kata naduh ki nonghikai kiba la ïoh ban pynlong ïa kane ka jingïalehkai na ka bynta ki khynnah skul ha kaba ka la long kawei na ki lad ba kum ki khynnah skul kin ïoh ban sei bad pyni ïa la ki sap ki phong ba ki ki don. U la ong ruh ba kum ki khynnah skul kim dei ban pynleh noh ei ïa ka por jong ki ha ki kam ki bym ler kam hynrei ki ban long kiba minit thop bad peit sha ka thong ha ki jingpule khnang ba ka lawei jong ki kan long kaba phyrnai.
Ha ka jingkren jong u u la ai nuksa ruh shaphang ka dkar bad ka skei ba kum ki khynnah skul ki dei ban bud ïa ka nuska jong ka dkar ha kaba watla ka long kaba suki hynrei ka don ïa ka thong bad ka jingkut jingmut ha ka jingim ban jop la ha kano kano ka jingïaleh. Shuh u la kyntu ruh ïa ki khynnah skul ba haba ki don ïa ka thong ban kiew ha ki jingïalehkai ki dei ban peit nuksa ruh ïa kawei na ki longkmie kaba dei na ka shnong Shngimawleiñ kata ka kong Kmoiñ Wahlang kaba la pynmlien ïa lade ha ki kam ïalehkai lyngba ka jingmareh thong bad kumjuh ruh kiwei de ki nongmareh thong kiba la paw khmat.
U bah Staising Khartbteng, Sub-Inspector of School hapoh ka ophis jong ka Sub Divisional of School Education Officer (SDSEO) uba dei u symbud kongsan ha ka jingkren jong u la ong ba ka sorkar ka pynrung ïa ki jingïalehkai ha ki skul, ka long kum shibynta ba ki khynnah skul kin long mlien ha ki kam kilanmet ka wanrah ruh ka jingproh ha ka jingmut jingpyrkhat, kin ïoh ruh ka met kaba shait ba khlaiñ bad ba khiah krat bad ka pyllait ruh ïa ki na ki jingmlien kiba sniew khamtam ha ki jingdih kiba pynbuaid. Kumta kum ki khynnah skul ki dei ban long borabor ki khynnah kiba pyndonkam hok ïa ki sap ki phong ba ki ki don la ha kano kano ka bynta jong ka jingim jong ki.
Namarkata, u la ai jingkyntu na ka bynta ki khynnah skul ba kum ka ktien phira jong ka skul ka long, “Raise Up and Shine” kumta ruh kum ki khynnah skul ki dei ban long kiba ïai minot ha ki jingpule bad long ruh ki khynnah kiba wanrah nam wanrah burom ïa ka skul lyngba ka jinglong jingim jong ki bad lyngba kata ka jingtrei shitom jong ki kin sa long kiei re kiei hadien habud.
“Ki khynnah skul kim dei ban ailad ba ka jingjaituh kan shongkulai ha ki, kiar na ki jingdih kiba pynbuaid kiba lah ban ktah ïa ka koit ka khiah bad ka bor jingmut jingpyrkhat, kiar na ka shongkha khynnah kaba lah ban ktah ban pynkut noh shiteng lynti ïa ki jingpule jong ki, kiar na kaba pynlut por than bad ki bor jong ka internet lyngba ki mobile jong ki”, ong u bah Staising bad ban lait na kine u la pashad jingmut ba kum ki khynnah skul ki dei ban phiah ïa ka por ha la ki jong ki jong ki bynta.
Ha kane ka sngi la ïoh ka jingkren lyngkot na u bah Kimland Kharlyngïong, Secretary Managing Committee jong ka Seven Sisters Secondary School, Mawmitbah bad ka jingshad na ki khynnah jong ka Lower Primary Section.
Hadien kata la ïoh ruh ban sam ïa ki khusnam sha ki khynnah kiba la ïoh ïa ka nam lahduh kata ha ka Sub Junior Girls la ïoh da ka Youbansheba Iawphniaw na ka Yellow House, Junior Girls sha ka Prettymerry Myrthong na ka Red House, Senior Girls sha ka Merysha Myrthong na ka Yellow House bad Senior Boys sha u Lamphrang Lyngkhoi jong ka Blue House. Nangta, ha ka 800 meter jong ki kynthei ba nyngkong ka Bansaralin Iawphniaw, ba ar ka Youbansheba Iawphniaw bad ba lai ka Prettymary Myrthong bad jong ki khynnah shynrang pat u Happystar Lyngkhoi ba wan ba nyngkong, u Wingstar Iawphniaw uba ar bad u Olban Iawphniaw uba lai.
Ki nongjop ha ka jingmareh 400m jong ki nonghikai kynthei ki long ka Phailinda Lyngdoh Mar-shilong ba nyngkong, ka Mancyfull Lyngdoh Sang-riang ba ar bad ka Dishalin L. Sangriang ba lai.
Ha kaba ïadei bad ka jingïoh ki poiñ na baroh ki jingïalehkai ka Red House ka ïoh haduh 90 poiñ, ka Green House ka ïoh 78, ka Blue House ka ïoh 76 bad ka Yellow House pat ka ïoh 71 poiñ.

Leave A Reply

Your email address will not be published.