Nongstoiñ, Ïaiong 13: Ka seng WKSU Nongstion circle ha ka jingïalam u vice president Badjuban Hoojon ha ryngkat ki dkhot ka seng, ki lah leit ban ïakynduh ïa u Deputy Commissioner ka West Khasi Hills District, ban pan jingshai halor ka jingslem ban pyllait ïa ki bill jong kiba trei ha ka por elekshon.
Ki Nongïalam ka seng ki la ïoh ka jingud jingnam na ki nongñiah kali halor ka jingpynslem ban siew noh ïa ki bill jong ki, hadien ba ki la shah pynngat election duty. Kumta ka seng ka leit ban ïakynduh ïa u D.C ban pan jingshai kiwei ki District ki lah dep ban ïoh.
U DC u lah pynshai ba ka jingpynslem ïa ki bill ka dei halor ka jingshim shuti ki officer ba dei khmih. Hynrei, u la kular ban shimkhia ïa kane ban pyllait noh la kumno kumno hadien shi taïew.
