Shipor la ïohi ba ka jingdih duma ha ki kali paidbah ka la sdang ban duna hynrei lehse na ka daw ka jingbym don ki aiñ kiba pyrkhing, sa shisien pat la ïohi ba katei ka jingdih duma pathar ha ki bos bad taksi kamai ka la sdang biang. Ym tang katta kaba kham i saitmet eh ka long ba ka jingdih duma kynthup ïa u sikret bad biri ka long kaba palat pud ha ki jaka ba long ïew ha ka nongbah kum ka Iewduh bad ruh ki bynta jong ka Khyndailad
Shaei ki aiñ khang dih duma baroh ki jah? Baroh la ju tip ba kito kiba ïoh ring ïa katei ka tdem ki kham don jingma arshah ban ïa kito kiba dih. Lada ka long kumtei hato mano ban shim ïa ka jingkitkhlieh?
La ju ïohsngew na ka por sha ka por ba ym ju shah ruh wat ban die ïa ki jingdih ba shna na u duma ha jan ki jaka pule kumjuh ruh ka jingdih duma bad sikret beaiñ ha ki jaka paidbah hynrei shano kine baroh mynta ki jah. Dei na kane ka daw ba kino kino ki sienjam ba shim da ka sorkar ne ki jingmana ym don ba patiaw ban pynsngew namar kim lah ban treikam pura hynrei i kumba kitei ki jingmaham ki long kum ki jingpynshlur shuh shuh ban nang leh ne nang pynjur arshah ïa kaba long baroh shi katta.
Na ka por sha ka por la ïohi ba ka don ka jingïatai, ïa syllok ne ki seminar ban ïakren halor katei ka phang bad ka jingma kiba bun ba ki paidbah ki lah ban ïoh lada ki kyrni ban dih ïa u duma hynrei kitei baroh imat ki long tang kumba ïathuh khana puriskam ha ki heprit tang ba kin ïohthiah bad klet noh tang shu khie mynstep. Ka jingjyllei ka jingdih duma bad sikret beaiñ ka jur bha ha Iewduh, kaba dei ka jaka ba ka ïa die ïa thied ka thnem bha. Kito kiba ju mlien ban dih kim ju salia satia wat ban pynmih ïa ka tdem ha khmat ki khunlung khynnah. Ha ka jingshisha ka KHADC khamtam eh ka Hima Mylliem ka la dei ban shimkhia ban khang pyrshah ïa katei ka jingdih duma pathar ha iew ha hat namar kadei ka phang kaba ktah ïa ka koit ka khiah jong ki paidbah.
Ka ju don ka jingong ba shisien ba la mlien la eh ban bthat ïa u kynjri jong ka, kane imat ka ïahap bha bad ka jingdih duma ha ki jaka paidbah ne wat ha ki jaka trei ba bun briew. Baroh kine ki sdang na la iing. Lada u kpa jong ka iing um kheiñ kor ïa la ki jong ki khun kiba dang rit lane ïa ki pyrsa bad kumjuh ïa ka lok kaba dang lungkhun khlem pep un ym kheiñbriew lada u don ha jaka paidbah la ka long ha lynti syngkien bad wat ha ki jaka ïew ruh. Hynrei ym lah pat ban len ba don ki briew kiba watla kim dei kiba la nang la stad ne trei ha ki ophis bapher bapher pynban ki tip ka burom ka akor ki kiar katba lah ban dih duma ne sikret ha jaka paidbah bad khamtam eh ha khmat ki khunlung. kane baroh kadei ka jingburom lang ym ka jingkhyllew bad ka jingsngewbaheh khlem da don shuh ka jingpyrkhat ïa kiwei.
U duma u dei u jingthung uba ka pyrthei ka tip ba u dei u jingdih uba pynïap jar jar ïa ki paralok kiba jan eh bad u. Ki riew wad bniah ki ïathuh ba da ki lak ngut ki briew ki ïap ha ka shi snem na kaba bam bad dih duma. Na kitei ki lak ngut, la ong ruh ba ki don bun ki shu ïap ei kha-ma-kha tang na ka daw ba ki ring mynsiem ïa ka tdem duma ba dih/tan kiwei. Namarkata, u nong dih duma uba dih duma hajan jong kiwei pat ki bym dih, ym tang ba u pynïap ïa lade hynrei u long ruh u Nong pynïap briew la kadei ïa ka kurim, ki khun, ne ki para ba trei lang.
Ka jingkyrni ban dih ïa u duma ka pynkulmar ïa kito kiba la ngat ha ka shrip jong u. Katei ka jingkyrni lah ban ong ba ka wan na ka jingthrew jong ka met katkum ka por ba kito ki nongdih ki ju pynmlien. Don kiba la kyrni ba dei ban ïoh duma beit ynda la dep bam ja ne dih sha. Don kiba dih ne bam 3 ne 4 sien ha ka shi sngi, don pat kiba dih beit ha kano kano ka por ba ki ïoh lad.
Wei haba la kyrni, u briew u lamwir lada ym ïoh. Ha ka khim khait, don kiba pan katba ïa kynduh khlem lehraiñ. Don kiba leit khynra ïa ki jaka bret biri sikret, ki kyndong kynshrot bad wat ïa ki tin ha ki paiñkhana ban leit wad ïa ki biri ne sikret lyngkhot tang ban ïoh pynhun ha ka por kwah. Don kiba khie shiteng miet ban leit shim na ki paralok ba kham pajih haba ki la threw palat. Kane ka long kumjuh ïa kito ki ba tyngkhap ïa u duma ha ki shyntur. Don kiba tyngkhap duma beit baroh shi sngi. Ynda ki la bret ïa uba ki la tyngkhap ki bujli noh da uwei bad kumta shi kumta baroh shi sngi.
Sa katno keiñ ngin sngewthuh ïa ka jingma jong u. Imat lada pynlong ïa ki rynsan ïa tai kaba kumno kumno ruh ym lah satia ban pynsngewthuh ïa ki paidbah. La ju ïohsngew ba ka jingkyrni ban bam ne dih ïa u ka khate haduh kumba 15 snem ïa ka rta, ka wallam ïa ka jingpang bam pong ha ka shyntur, tang nguid, tyngkro, ki tor, ki snier bad nier bah, khyllai, ki panjung bad wat ïa ka pla khun ruh, ka jingpang jyrhoh bad sahiaw, ka ktah ïa ka jingkoit jingkhiah i khunlung ha ki kynthei kiba armet. Hynrei kitei baroh ki jingpynshai ki long kumba ki sawa ha ‘RI KHLAW’ namar ym don kiba pdiang katba kim pat mad ïa ki jingpang ha la ka met la jong.
Kaba kham i sangsot ka long ïa kito ki bahaïing hasem, ka kurim, ki khun, ki para ba treilang kiba dei ki nongtan pateng ïa ka tdem kaba mih na kito ki nongdih duma khlemakor ki bym ju pyrkhat satia ïa kiwei pat. Hynrei don pat ki riew rangbah kiba wan na ki longïing kiba don burom, kiba tip ïa ka koit ka khiah jong ki khun ne jong ka kurim, kiba pyrkhat ïa ka imlang sahlang, kim ju dih satia ha ki jaka paidbah hynrei ki pyrshang katba lah ban kiar na kum kitei ki jaka.
