Shillong, Lber 26 : Ka Pyrda FC ka la ïoh rah ïa ka nam lahduh jong ka 13th A S Khongphai Memorial U-14 Football Tournament 2022-23 ba la pynïaid da ka Upper Shillong Sports Social & Cultural Association hadien ba ka la pynliem noh ïa ka Nongpiur SC da 5-3 kol, ha ka jingïalehkai final kaba la long ha ka 25 tarik Lber, 2023 ha madan Nongpiur.
Ha kane ka sngi la wan ban pynhap pyrda ïa kane ka lympung da u MLA ka Mylliem, u Bah R V Lyngdoh, ka Pyrda FC kaba long ka lahduh ka la ïoh rah ïa ka trophy bad ka song pisa kaba long 20,000 tyngka bad ka Nongpiur ka la ïoh ban rah ïa ka trophy bad ka song pisa kaba long 10,000 tyngka.
La ïoh ruh ban sam ïa ki khusnam shimet kaba kynthup ïa ka Best Player kaba la ïoh da u Andrew Tangsong jong ka Nongpiur SC, Top Scorer la ïoh da u Jason Paul Mawrie jong ka Nongkseh Rim, Best Goalkeeper la ïoh da u Ronald Jyrwa jong ka Pyrda FC, Best Manager la ïoh da u K Syiemlieh jong ka Pyrda FC, Promising Players la ïoh da u Nathaniel Janong jong ka Lummawbah Mawbynna bad u Metei Shaphrang Kharlor jong ka Nongumlong Junior bad ka Best Discipline team la ïoh rah da ka Lummawbah Mawbynna.
