Lah khlaiñ bad ïoh mih u Symbud Myntri Rangbah na Apollo Hospital bad sah shwa ha Meghalaya House

Shillong, Nailur 17 : U Symbud Myntri Rangbah ka jylla u bah Prestone Tynsong u lah khlaiñ hadien ba la dep ïoh ka jingsumar na ki bynta ka khlieh bad ka jingsei ïa ka jinglang snam na jabieng ka long kaba jop.
U Symbud Myntri Rangbah ula ïaid la ïeng bad u la ïoh ruh ban mih na ka Apollo Hospital New Delhi ha ka Lah Sngi U Blei 16.9.24 bad mynta u sah ha Meghalaya House New Delhi namar ki Doktor ki dang phah ap ban eksamin bha biang bad pyndep ïa ki test shwa ban shah ban leit phai noh sha la ïing sha Shillong.
La ïathuh ba ka bam ruh i bam kumba ju bam hi mynta bad ym don kano kano ka jingthut jingwit shuh.
Lah ban pynkynmaw ba u Symbud Myntri Rangbah u la ud kthah klieh shwa nyngkong bad u shu sumar hi ha la ïing hynrei ha ka 9 tarik namar ka jingkthah khlieh ka ïai bteng u la phah khot doktor sha ïing bad hadien kane ki doktor ki la phah ba in leit leh ïa ka MRI ha Civil Hospital bad dei hadien ba ïoh ïa ka report la lap ba don ka jinglang snam ha jabieng ba sa ïalam ïa i sha Nazareth Hospital bad la pynthiah ïa i ha ICU.
Ha ka Sngi Balang kata ha ka 11 tarik i la leit shah sumar sha Apollo Hospital New Delhi. Ha ka Sngi Palei kata ha ka 12 tarik ki doktor ki la sumar bad puid ban sei ïa katei ka snam ba lang ha jabieng bad ka jingsumar ka long kaba jop. Hadien ba la sumar la pynthiah ïa i ha ICU kumba shisngi bad hadien kane la pynkynriah noh ïa i sha Ward. Mynta i la khlai bad la ïoh ban leit sah pat ha Meghalaya House tad haduh ban da pyndep ïa ki Test shwa ban wan phai ïing noh.