Lada ym pynïasoh Aadhar kan buh jingeh ïa ki paidbah ban pyntreikam ïa ka MHIS: Dr. Ampareen

Shillong, Lber 29 : Ka Myntri ka tnad ka Koit ka Khiah ka Jylla, Dr. M Ampareen Lyngdoh ka la ong ba na bynta kito kiba la don ïa ka card Meghala Health Insurance Scheme (MHIS) ki donkam pat ban pynïasoh bad u Aadhar khnang ba kin ïoh ïa ka jingshakri kaba paka.
Haba kren bad ki lad pathai khubor dang shen, ka Myntri ka la ong, “Ka mangtyngka na bynta kane ka wan na ka jylla bad ka wanlang ruh na ka sorkar pdeng bad kumta ngi pynrung lang hajuh.”
Nangta ka ong ruh ban ïoh ïa ka MHIS lada ym don pat ïa u Aadhar kan buh ha ka jingeh ïa kito ki paidbah haba ki donkam kyrkieh.
“Ban pynïasoh hangto hangto ïa u Aadhar bad ka MHIS kam dei satia ka kam kaba suk bad kumta haba ïoh ïa ka jingpang kaba kynsan kynsan phin ym tipbriew kumno shuh ban leh,” ka la ong.
Katkum ka jingïathuh jong ka Myntri, ban pynïasoh ïa u Aadhar bad ka MHIS kadei ka kam kaba shimpor naduh ban shim ïa ki biometric jong ka khmat bad kiwei kiwei.
Ha kawei ka liang, ka la ong ba kam ïahap ruh ba kito kiba kwah ban ïoh jingmyntoi na ka MHIS ki leit pat ban thiah ha ki kamra private kane ruh kadei kawei ka kam kaba eh bha. “Ka jingkylli ka long ba haduh katno ba phi donkam ïa ka kamra private. Hato la da ai jingthoh da ki doktor ba donkam ban thiah ha ki kamra private ban ïoh ïa ka jingsumar kyrpang ne ka shu dei ba phi shu kwah ban leit,” la bynrap biang ka Myntri.
Kumta, ka Myntri ka ong ba kum kine ki paidbah ki dei ban sngewthuh. Ha kajuh ka por, ka Dr. Ampareen ka ong ruh ba ki paidbah ki dei ban tip ïa kito ki jait test ba ka MHIS ka ïarap ban kyrshan lang ïa ka jinglut. “Ki hap ban peit ba kitei kita ki jait test kiba ka MHIS ka kyrshan. Ïa kum kita ruh ki don ki kyndon.”
Ha kajuh ka por, ka Myntri ka la ong ba ki la dep bthah ïa ki Block ba kin leit sha ki shnong na ka bynta ban pynïasoh Aadhar ïa ki MHIS khnang ba ka jingmyntoi jong ki paidbah na kane ka skim kan kham bun na ka 78 persen kaba don mynta.