Lada phi thom da ka bor ban tih Uranium ka jaidbynriew kam banse ban khyllie biang ïa ki dulir ïasoh India: Lambokstarwell

Shillong, Naitung 30: U President ba rangbah jong ka Khasi Students’ Union(KSU) u Samla Lambokstarwell Marngar u la takraiñ tyngeh ïa ka sorkar India halor ka jingap beit jong ka kliaw ban tih ïa u Uranium ha ka jylla. U samla Lambok u la kren bynñiaw ïa ka jingshim kabu ki riew saiñpyrthei ha ka kyrteng ka jingkylla ha man ba wan ka ilekshon.
Haba ai jingkren ha ka jingpyntian smai ïa ki nongkitkam jong ka KSU Laban Circle, u Samla Lambokstarwell u la ong ba kum ki dkhot ka KSU ki dei ban kynmaw dngong ba ki nongtrei ba khlem ïoh tulop kum ki sahep sorkar hynrei ka baiñong kaba ki ïoh ka dei ka jingshah kynthoh bad ka along. U Samla Lambok u la ther ruh ïa ka sorkar India halor ka mat Uranium namar kat haduh mynta mynne ruh kam shem la sahngeh ïa ka jingthmu tih Uranium ha ka jylla.
“Ha shuwa ba ka sorkar India kan thom da ka bor ïa ka jingtih Uranium nga kwah ban ong da kaba shai ngin khyllie shuwa ïa ka duilir kumno ka jaidbynriew ka shah pynïasoh sha ka India” ong u Samla Lambok.
U Samla Lambok u la kyntu ruh ïa ki dkhot ka jaidbynriew baroh ba kin long kiba ieid ïa ka jaidbynriew ha kino kino ki lyngkha kiba ki trei.
Shuh shuh u la ong ruh “Ngi im ha ki sngi kaba kum ka jaidbynriew ka mad ïa ka thma ba jarjar kaba jur bha bad lada ngim husiar bad ngim kylla bamut ban ïada la ka jaidbynriew kan poi ka por ba wat kata ka jingkylla bamut ruh kam ap shuh” u la ong.
Haba kren halor ka jingïoh bat ka KSU ïa ki mynder u Samla Lambok u la ong “Trei shitom ki dkhot ka KSU ban thwet ïa ki mynder kiba wan rung tuh ngi ïohi mano pat kiba shim ïa ka nam”
U Samla Lambok u la ther tyngeh ruh ïa ki Long Sutnga ka jaidbynriew kiba lilam ïa ka jaidbynriew na bynta ka jingïoh nong ba shimet jong ki. Shuh shuh u la kyntu ruh ïa ki dkhot jong ka seng ba kin long ki samla kiba kit khlieh na bynta ban ïada ïa ka jaidbynriew ïoh ba kan jia shen ka apot ha ka jaidbynriew kumba la jia ha Tripura. U Samla Lambok u la ban tyngeh ba ba kin long kiba kloi ban len ïa lade na bynta ka jaidbynriew ha kino ma kino ki kam da kabna khot ba wer ruh ïa ki kmie ki kpa ba kin ai mynsiem ïa ki khun ban trei na bynbta ka jaidbynriew.
“Phi ki kmie ki kpa bad ki khun samla wat sngewlehraiñ lada phi shah set along na bynta ka jaidbynriew hynrei to kmen pynban ba phi la leh ïa ki kam kiban pynmyntoi ïa ka” u la ong
“Man ba wan ki san snem ngi ïohsngew ba baroh ki pyrta ïa ka jingkylla hynrei la san phew snem ngi la ïaid kum ka jylla kaei ka jingkylla ngi la ïoh. peit naduh ki aiñ kiban ïada ïa ka jaidbynriew, ki lad kiba ki shim ban kyntiew ïa ka pule puthi bad ka ïohkam ïohjam hato ngi la ïohi mo kum ka jylla” u la buh jingkylli.
“Ngi dawa ia ki aiñ ban tehlakam ïa u mynder uba wan rung ha ka jylla hynrei kat haduymynta ngim pat ïoh to long phi kiba la khreh ban long hi kita ki aiñ na bynta ka jaidbynriew” kyntu u Samla Lambok.
“Kita ki nongthaw aiñ kiba ngi la phah ba kin shna aiñ na bynta ka ri vbad ka jaidbynriew ki shna pynban da ka aiñ ïakhalai” u la ong
Ka Kong Badariti L Nonglait ha ka jingkren jong ka ka kyntu ïa ki samla ba kin ym set noh ki shkor bad khap noh ki khmat ban sngap bad peit a ki jingdonkam ka jaidbynriew.
“Wat khap noh ki khmat bad wat set noh ki shkor namar dei ka jingdon kiba kum ma phi bna ngi sngew shngaiñ kum ka jaidbynriew. Ki ju kren ruh ba shisien ka sngi ngi lah ban long mraw ha ri lajongh nga lei nga ong ngi la long mraw ha baroh ki liang” ong ka kong Badariti
“To Ïeng joit ban ïada ïa ka jaidbynriew ïoh ba kan poi ka por ba ngin sah tang ha ki kot pule bad tang kum ki jingpyni ha ki museum shaphang ka jaidbynriew” ka la ban tyngeh.
Ha kane ka sngi jingpyntian smai ïa ki nongkit kam ka KSU ki kynthup ïa u Samnla Danial Khyriem, ki dkhot ka seng, ki kmie ki kpa lem bad kiwei de ki nongshah khot sngewbha.
Ïa ki nongkit kam ba thymmai ka KSU Laban na bynta ka samoi trei kam jong u snem 2022-23 ki long u Samla Reuben Najiar kum u President, Samla Johnson Nongkhlaw kum u Vice President, Samla Jason Laloo kum u General Secretary lem bad kiwei de ki nongkit kam.