Lada lap ba don kiba ioh ia ka jingpang Dengue ha khappud dei ban pyntip mar mar sha ka sorkar
Shillong Nailar 18 : Ka tnad ka koit ka khiah jong ka Meghalaya ka la bthah ïa ki nongtrei ba don ha ki thaiñ khappud jong ka ri ba kin long kiba peitngor halor ka jingkiew jong kiba ïoh ïa ka jingpang dengue ha Bangladesh.
Haba kren bad ki lad pathai khubor, u Myntri ka tnad ka Koit ka Khiah u Bah Wailadmiki Shylla u la ïathuh ba haduh mynta hi ki la ïoh ingtip ba ym pat don kano kano ka jingkiew kaba pynkhuslai ha ki thaiñ khappud jong ka jylla.
U la ong ba ka tnad ka la dep bthah ïa ki nongtrei ba don ha ki thaiñ khappud ban peitngor bad ban pyntip mar mar lada don kano kano ka jingkylla ha ka jinglong jingman.
“Na ka tnad ka koit ka khiah ngi la bthah ïa ki team jong ngi, khamtam kiba don ha ki thaiñ khappud. Ngi la pyntip ïa ki bad ngi la ong ïa ki ban long kiba peitngor, hynrei haduh mynta ngim pat ïoh ïa kano kano ka jingpyntip kaba pynkhuslai, khamtam na kine ki thaiñ khappud.”
U la ong ba ka tnad ka don ruh ïa ka surveillance team kaba leit kylleng ban lum jingtip bad peit ïa ka jinglong jingman jong ki jingjia.
Related Posts
“Ngi don ïa ka surveillance team kaba leit kylleng bad peit ïa ka jinglong jingman. Hynrei haduh mynta ym pat don kano kano ka jingjia kaba pynkhuslai ne kano kano ka jingkiew kaba don jingsyier.”
U Myntri u la ong ba ki Sub-Centre, CHC bad PHC ha ki thaiñ bapher bapher ki la ïoh ïa ka jingbthah ban long kiba peitngor.
“Ngi la ong ïa ki health institutions jong ngi, kum ki Sub-Centre, CHC bad PHC, ban kiba peitngor bad ban peit lada don kum kine ki case, bad ban pyntip ïa ngi.”
Hynrei, u la ong ba ka Meghalaya kam pat ïohi ïa kano kano ka jingma na ka jingpang dengue, watla don ki case kiba ju wan man ka por.
“Haduh mynta ngim pat ïohi ïa kano kano ka jingkiew kaba pynkhuslai, watla don ki case kiba ju don. Kumba la ïohi ïa kaei kaba jia ha ka ri marjan, ngim pat ïohi ïa ka jingkiew kaba kumta ha ka jylla jong ngi.”
U Myntri u la pynthikna ba ka tnad kan dang bteng ïa ka jingpeitngor lyngba ki surveillance team.