Shillong, Nailar 18: Ki pulit ka East Khasi Hills District ki la pynkup burom ïa arngut ki rangbah kiba ju leh ïa ki kam ba bha, kiba kynthup ïa u Bah Samborlang Diengdoh bad u Bah Anthony Nongkhlaw, halor ka jingkyrshan jong ki ïa ki pulit pynïaid kali ka Nongbah Shillong ba kin kyntiew ïa ki lad jingïada ha surok bad ki jingkitkhlieh kiba pyndonkam ïa ka surok.
Ha kane ka sngi la ai burom ruh ïa ki 17 ngut ki pulit pynïaid kali bad ïa 24 ngut ki Home Guard volunteer, ba kynthup ïa ki 12 ngut ki longkmie halor ki jingaiti bad ki kam shakri jong ki ïa ka imlang sahlang.
Kiba shah pynkup burom ki la ïohpdiang ïa ki syrnot ai burom bad ka pisa.
U Superintendent of Police u Bah Vivek Syiem u la ïaroh ïa ki kam jong ki bad ha kajuh ka por u la kyntu ïa ki pulit ban ïaineh ha ka burom ka akor bad ban burom markylliang, hynrei ha kajuh ka por ban ïengskhem, ban khuid bad bym shah shiliang haba pyntreikam ïa ki aiñ pynïaid kali.
Kane ka prokram ka pynkynmaw ïa ka jingaiti lang jong ki pulit bad ki nongshong shnong ban pynlong ïa ka surok kaba don ki lad jingïada bad ka jingbeit ryntih ki kam pynïaid kali, ong ka kyrwoh khubor.
