Ïatai ka jingïalang Bharat Scouts and Guides ïa ka bha ka miat ki samla bad ka thong ka synjuk

Shillong, Nailar 18: Ka Meghalaya Bharat Scouts and Guides ka la pynlong ïa ka 29th State Council Meeting, ba dei ka jingïalang ba hakhlieh tam jong ka jylla ha P.J. Bazeley Hall, State Headquarters, Shillong ha ka sngi baar.
Katba ki nongïalam ha kane ka jingïalang, la pynïaid da u V.K. Mantri, IAS ka Commissioner bad Secretary ka tnat shlem jingstad bad u State Chief Commissioner jong ka Meghalaya Bharat Scouts and Guides, namar ka jingbym don ryngkat u Dr. Shakil P. Ahammed, IAS, Chief Secretary ka Sorkar Meghalaya bad u President ka Meghalaya Bharat Scouts and Guides.
Ka jingïalang ka la sdang da ka jingkynmaw ieid bad ka jingsngap jar baroh shi khyllipmat ban ai burom bad sngewlem ïa ka kong Rebecca. V. Suchiang, bam kwai ha dwar u Blei, IAS, kaba la long ka Chief Secretary barim bad ka President barim jong ka State Association.
Ki mat ba la ïatai ki long halor ki rai kiba donkam bha ban kyntiew ïa ki thong jong ka synjuk, khamtam halor ka jingpynbiang bor bad ka jingkyntiew ïa ki kam jong ki samla ha ka jylla. Ha kane ka jingïalang, u State Chief Commissioner u la pynlait paidbah ïa ka Annual Report na ka bynta u snem 2025 – 26 bad u la pynpaw ïa ka jingïaroh bakhraw ïa ka jingtreihok jong ki dkhot ka council. Katba ïa ka kyntien wai jong u, u la ai khublei ïa ki dkhot baroh bad u la pynrem ïa ka jingdonkam ban kyntiew ïa ka jingñiew briew bad ka jingpynïasoh dkhot hapoh ka jylla.
U la khot la wer ban don ka jingtrei shitom kaba ïai bteng na baroh ki liang ban pynskhem ïa ki jingtrei naduh tynrai. Ka jingïalang ka la pynkloi da ka jingrwai Ri (National Anthem), kaba pynkynmaw ïa ka jingtylli bad ka jingïasnoh lang ban kyntiew ïa kane ka synjuk kaba ïaid shakhmat.