Hikai ka NECTAR ban pyni ka lad jingïarap katkum ki jingstad saïan ban pynïar ïa ka rep ka riang

Shillong, Nailar 18: Naduh ka jingrep ïa u saffron ha kylleng ka thaiñ shatei lammihngi haduh ki jaka pynkhreh ïa ki jingbam kiba poi sha ki nongrep ha ki jaka ba jngai, ka North East Centre for Technology Application and Reach (NECTAR) ka la pyni ïa ki sienjam ba la pynïaid da ka teknoloji ha ka jingïalang kaba man la u bnai jong ka Inter-Media Publicity Coordination Committee (MPCC) kaba la pynlong ha ophis treikam jong ka ha Shillong, mynta ka sngi.
La ai jingtip ïa ki nongïashim bynta shaphang ki sienjam jong ka NECTAR kiba thmu ban shim ïa ki lad ki lynti kiba katkum ka jingstad science bad ka teknoloji khamjan sha ki shnong ki thaw ha kylleng ka thaiñ Shatei Lammihngi. U Dr. Arun Kumar Sarma, Director General, NECTAR, u la kren shaphang ka jingtreikam jong ka Centre halor ka jingrep ïa u saffron ha ki bynta bapher bapher jong ka thaiñ, kynthup ïa ka Sikkim, Arunachal Pradesh, Meghalaya bad Mizoram, kaba pyni ïa ka lad jong ki jingïarap katkum ki jingstad saïan ban pynïar ïa ki lad ba ïadei bad ka rep ka riang.
Ka Centre ka la pyni ruh ïa ka Mobile Food Processing Unit jong ka, kaba la shna ban rah ïa ki lad pynkhreh bad ki lad kyntiew kam khamjan sha ki nongrep ha ki jaka ba jngai. Ka jaka ka kyrshan ïa ka jingpynkhreh ïa ki mar rep naduh ka jingpynbiang ïa ki mar haduh ka jingkyntiew ïa ka kam, ka jingthep ha ki bilor bad ka jingsong, kynthup ïa ki jingpynbeit tetra-pack, kaba ïarap ban kyntiew ïa ka jingpynïaid hadien ba la dep ot bad ka jingpynïoh ïa ka dor na ka bynta ki nongrep.
Hadien ka jingïalang, ki nongïashim bynta ki la leit jngoh ïa ki jaka treikam ba kongsan jong ka NECTAR, kynthup ïa ka Vasundhara Soil Lab, STEM Lab, GIS Lab bad Mobile Processing Unit. Ki ophisar jong ka NECTAR ki la ai jingtip ïa ki nongïashim bynta shaphang ka jingtreikam bad jingpyndonkam ïa kine ki jaka, da kaba ai ïa ka jingbatai markhmat kumno la pyndonkam ïa ki lad ki lynti katkum ka jingstad saïan, ka teknoloji bad ki lad geospatial ban weng ïa ki jingeh ha ka thaiñ bad ban kyrshan ïa ki briew ha kylleng ka thaiñ shatei lammihngi.
Ïa kane ka jingïalang la pynlong da ka Press Information Bureau (PIB), Shillong, Tnad Information and Broadcasting kum shibynta ka sienjam jong ka IMPCC ha ka thaiñ kaba thmu ban pynkhlaiñ ïa ka jingai jingtip, ka jingïatreilang bad ka jingïasam jingtip hapdeng ki tnad Sorkar, ki kynhun bad ki lad pathai khubor.
Ki nongmihkhmat na ka IIM Shillong, ICAR-Umiam, NEEPCO, tnad Census, MY Bharat, IMD Shillong, PIB & CBC Shillong, Tnad Soil & Water Conservation, Akashvani Programme Section, Akashvani North Eastern Service (NES), NEIAH bad kiwei kiwei ki kynhun kiba ïashim bynta ki la wan ban ïashim bynta ha kane ka jingïalang bad ki la ïasam ïa ki jingtip shaphang ki prokram jong ki kiba dang ïaid shakhmat, ki jingjop bad ki kam ki ban sa wan.
Ki nongïashim bynta ki la ban jur ïa ka jingdonkam ban don ka jingïatreilang kaba khambha hapdeng ki tnad bad ka jingïatreilang bad ki lad pathai khubor ban pynthikna ïa ka jingpynsaphriang jingtip kaba khamïar shaphang ki sienjam jong ka Sorkar bad ki prokram kiba ïadei bad ka bha ka miat jong ki paidbah. Ki jingïakren ki long halor ka jingsam jingtip, ka jingpynbna paidbah ba ïasohlang bad ka jingwad ïa ki lad ki lynti na ka bynta ki kam ba ïatreilang ha ki kam pathai khubor, ka jingleit jngoh ïa ki jaka treikam bad ka jingïasam ïa ki khana jingjop lyngba ki rynsan pathai khubor bapher bapher.
La pyni ïa ka IMPCC kum ka rynsan kaba treikam bha ban pynkhlaiñ ïa ka jingïatreilang hapdeng ki kynhun jong ka Sorkar bad ban pynsuk ïa ka jingai jingtip kaba kham kloi, kaba thikna bad kaba pynshong nongrim ha ki briew ha kylleng ka thaiñ shatei lammihngi.
Ha kane ka jingïalang, la rai ruh ba baroh ki tnad bad ki kynhun kiba ïashim bynta kin rakhe ïa ka Hindi Diwas bad ka Hindi Fortnight ha u bnai Nailur 2026 ha ka rukom kaba dei, ryngkat bad ki prokram bad ki kam kiba biang ban pynshlur ïa ka jingïashim bynta kaba kham heh bad ban kyntiew ïa ka jingpyndonkam ïa ka ktien Hindi ha ka jingai jingtip ka Sorkar.
Ka jingleit jngoh bad jingïakren ha ka NECTAR ka la ïarap ïa ki jingthmu jong ka IMPCC da kaba ai ïa ki nongmihkhmat jong ka Sorkar bad ki lad pathai khubor ïa ka jingsngewthuh shaphang ki jingïarap ba la pynïaid da ka teknoloji ha ka thaiñ bad pynsuk ïa ka jingpynsaphriang jong ki kaba kham jylliew bad kaba kham bniah lyngba ki lad pathai khubor bapher bapher.